Сүхбаатар аймгийн Онгон сумын харьяат, “Болор цом-34” яруу найргийн наадмын тэргүүн байрын эзэн, яруу найрагч Борхүүгийн Батсайхантай цөөн хором ярилцлаа.

-“Болор цом-34” яруу найргийн наадмын эзэн болсонд баяр хүргэе. Энэ баяраа хамгийн түрүүнд хэнтэй хуваалцсан бэ?

-Баярлалаа. Нутгийн минь уул ус, хийморь түшлээ. Хамгийн түрүүнд гэр бүлийнхэндээ дуулгасан даа. Дараа нь нутгийнхан болон найзууд гээд л.

-Таны шүлэг интернэт, сонинд нэлээн нийтлэгдэж. Ихэнхи хүн чамлалттай хандсан байна билээ. Та ч харсан байлгүй. Үүнд ямар хариулт өгөх вэ?

-Яг үнэндээ би цоо шинэ хүн биш. “Болор цом” наадамд 10 удаа шүлгээ өгөхдөө найман удаа шилдэг 30-д багтаж байсан. Өвөрхангай аймагт болоход нь айргийн гуравт багтаж байлаа. Том жижиг 30 орчим яруу найргийн наадмаас түрүү, айраг хүртсэн. Би “Шинэ мянган” утга зохиолын нэгдэлд харьяалагддаг. Манай үеийнхнээс Ж.Мөнхбат, Ш.Лхамноржмаа, Н.Гантулга, Ц.Эрдэнэбаатар нарын зэрэг нөхөд маань “Болор цом”-ын эзэн болсон. Энэ удаа би хүртсэндээ баяртай байна. Намайг шүүмжилээд байгаа хүмүүст хандаж хэлэхэд “Юм хийж байгаа хүнээ муулахаасаа урьтаж, хийгээгүйг нь хэлээч ээ”.

-Та “Тэр эмэгтэй” шүлгээ хэзээ бичсэн бэ?

-Саяхан бичсэн. Энэ том наадмын түрүүг яагаад ийм шүлгээр хүртэж болохгүй гэж бодоод л бичсэн, өрсөлдсөн. Бас чадсан. Уянгын шүлэг байж болно шүү дээ.

-Зохион байгуулалтын хувьд ямар санагдсан бэ?

-Маш сайхан. Тэнд цугласан бүх хүн энэ үгийг хэлнэ дээ.

-Таныг хүмүүс “Дорнод аймгийн Засаг даргын эхнэртэй хамаатан. Тэгээд л энэ наадмын түрүүг хүртлээ” гэх юм...

-Би түүнтэй огт хамаагүй. Миний эхнэр Булган аймгийн Сайхан сумынх. Гэтэл огт танихгүй хүмүүс хүртэл тэгж хэлсэнд гайхаж байна. Арга ядахдаа тэднийг би “Ураг судлаач” юм болов уу гэж бодоод байгаа. Би нэг л эхнэртэй хүн. Дорнод аймагт эхнэр байхгүй.

-Мөнгө өгч түрүүллээ ч гэж ярьж байна ...

-Намайг мөнгөтэй болгож харсан хүмүүст баярлалаа. Тэгж харагдана гэдэг би чинь өнгөтэй л байна гэсэн үг биз дээ. Гэвч би номоо ч хэвлүүлж чадахгүй байна шүү дээ.

-Та утга зохиолын босгоор хэдэн онд анх алхав?

-1990 оноос хойш. Уг нь би сумынхаа уурын зууханд галчаар ажиллаж байсан юм. Тэр үед манай сумын цэргийн ангид ажиллаж байсан ахмад Зоригоо гуай надтай утга зохиолын тухай олон сайхан зүйл ярьдаг байлаа. Тэр нь л надад их нөлөөлсөн дөө. Зоригоо ах яруу найрагч О.Дашбалбар агсны төрсөн дүү Балжиннямын гэр бүлийн хүн юм.

Тэр эмэгтэй

Тэр эмэгтэйд би хайртай

Тэвэрч аваад үнсэхэд нь дуртай

Даарсаар очиход минь угтан авч

Бээрсэн гарыг минь бүлээцүүлж өгдөг

Гоо үзэсгэлэнт тэр хүнээс

Голт зүрх минь хайр мэдэрдэг ээ

Тэр эмэгтэйд би хайртай

Тэртээ холоос ч угтдаг нь дуртай

Халууцсаар очиход минь тоон авч

Хөлсийг минь арчин сэрүүцүүлж өгдөг

Гомдоож ердөө боломжгүй тэр хүнээс

Гоо үзэсгэлэнг илүүтэй мэдэрдэг ээ

Жирийн л нэг Монгол эмэгтэйгээс

Жинхэнэ хайрыг би мэдэрдэг ээ

Хайр гэрэлтүүлсэн тэр эмэгтэйг

Ээж гэдэг