Өнөөдөр УИХ дахь МАН-ын бүлэг ээлжит хуралдаанаараа ирэх оны төсөв болон түүнийг дагалдах хуулийн төслүүдийн талаар хэлэлцлээ. Ирэх оны төсөвтэй холбогдуулж МАН-ын бүлэг төрийн албан хаагчдын цалин, ахмад настны тэтгэвэр, тэтгэмжийг 30 хүртэл хувиар нэмэгдүүлэх ёстой гэж үзэж байна.

 

Хэдийгээр инфляцийг нэг оронтой тоонд барьж байгаа гэж эрх баригчид мэдэгдэж байгаа ч ард иргэдийн амьдралд энэхүү үзүүлэлт хоёр орон тоогоор хэмжигдэж буй, төгрөгийн худалдан авах чадвар 30 хувиар суларсан өнөө үед цалин, тэтгэврийг нэмэх зайлшгүй шаардлага үүсч байгааг МАН-ын бүлгийн гишүүд онцоллоо. Засгийн газар ирэх онд цалин, тэтгэврийг нэмэгдүүлэхэд 200 гаруй тэрбум төгрөг зориулна гэж төсвийн төсөлд тусгасан. Ийм мөнгөөр цалин, тэтгэврийг 8-10 хувиар л өсгөх боломжтой аж. Гэтэл шүүгчдийн цалинг 2-4 сая төгрөгөөр нэмэх саналыг Шүүхийн ерөнхий зөвлөлөөс оруулж ирсэн бол Сангийн яам шүүгчдийн цалинг одоо мөрдөж буй хэмжээгээр байлгах санал тусгасан байна.