Чехийн жуулчдын клубын ерөнхийлөгч, Африк, Азийн  олон орноор аялж 10 гаруй ном бичсэн П.Ягода Чехээс Монгол Улс руу аялж буй жуулчдад зориулсан гарын авлага  болгож “Морьтон монголчууд” номыг бичжээ. Тэрээр өмнө нь манай улсад 2006 онд ирж морин аялал хийж байсан бөгөөд тухайн үед төрсөн сэтгэгдэл, гэрэл зургууд зэрэг дээрээ түшиглэж уг номыг бичсэн байна. Монголын байгалийн үзэсгэлэнт газрууд, монгол ахуйг харуулсан 40 шахам хуудас гэрэл зураг бүхий 214 хуудастай уг  ном Чехэд уншигч олны анхаарлыг багагүй татаж байгаа аж. Ном хэвлэгдэн гараад сар хүрээгүй байхад  Чехийн телевиз, радиогоор  дөрвөн удаа мэдээ, ярилцлага, нэвтрүүлэг гарчээ.