Умард Солонгос улс шинэ оны босгон дээр анхны цанын баазынхаа нээлтийг хийлээ. Тус улсын төв телевизийн дамжуулж байгаагаар 2013 оны сүүлийн өдөр болсон нээлтийн ёслолын ажиллагаанд залуу удирдагч КИм Чен Ын тэргүүтэй өндөр дээд албан тушаалтнууд оролцжээ.

 

Энэхүү цанын баазыг Вонсан хотын ойролцоох Машик ууланд барьж байгуулсан байна. Энэ газрын  байгалийн тогтоц, уур амьсгал зэрэг нь цанын бааз байгуулахад хамгийн тохиромжтой гэж үзэн залуу удирдагчийн тушаалаар бүтээн байгуулах ажлыг эхлүүлжээ. 2013 ондоо багтаан ашиглалтанд оруулахын тулд 10,000 цэрэг өдөр шөнөгүй ажилласан аж.

 

Энэхүү амралт, зугаалгын цогцолборт цанын 11 зам, агаарын цахилгаан өргөгч шат, 200 гаруй өрөөтэй тансаг зэрэглэлийн зочид буудалтай. Нээлтийн үеэр залуу удирдагч агаарын өргөгч шатны анхны үйлчлүүлэгч болсон байна. Тэрээр энэхүү цанын баазыг барьж байгуулсан нь гадны жуулчдыг татаж, гадаад валютын нөөцөө нэмэгдүүлэх замаар эдийн засгийнхаа хөгжлийг тэтгэх зорилготой гэж байгаа ч ажиглагчид үүнийг Ким Чен Ын-ы одоо баримталж байгаа дэглэм бат бөх, тогтвортой болохыг харуулах гэсэн оролдлого гэж үзэж байна.