Ойн сан бүхий газраас 100 метрээс доошгүй зайд иргэн, аж ахуйн байгууллага үйл ажиллагаа явуулах болон суурьшихыг хуулиар хориглосон байдаг. Харин хүний хөл, дуу чимээнээс хол, цэвэр агаартай зэрэг шалтгаанаас үүдэн иргэд ногоон бүсий ой, усны сав бүхий орчинд газар өмчлөн авсаар байна.

Улаанбаатар хотын уушги нь болсон ой модоо бид хайрлаж, хамгаалах ёстой. Гэтэл өнөөдөр хүссэн нэг нь ой модон дунд хашаа хатгаж, модыг нь авч хаяад байшин барьж, жорлон ухаж байна.

Ингэснээр ой модны амьтад дайжиж, ургамлын амьдрах орчин үгүй болж байгаа юм. Энэ бол нийтийн өмчийг нэг хэсэг хүмүүс өөрийн тав тухтай, эрүүл аж төрөх орчноор үгүй хийж байгаа амин хувиа бодсон үйлдэл.

Одоогоор нийслэлийн хэмжээнд ногоон бүсэд суурьшсан 10 мянга гаруй айл өрх байна. Мөн нийслэлийн сонгинохайрхан дүүрэгт гэхэд ногоон бүсийн 2400 гад 1780 гаруй иргэн, аж ахуйн нэгж суурьшжээ.

Тэдний 1500 орчим нь Газар зохион байгуулалтын төлөвлөгөөнд тусгагдсан газарт газар өмчилж бас эзэмшжээ. Ингэхдээ нийслэлийн ногоон хөгжил байгаль орчны газрын үндэслэлээр нийслэл болон дүүргийн засаг даргын захирамжаар газар олгосон гэж байлаа. Харин ой модон дунд хууль бусаар суурьшсан иргэдийн байшин барилгыг буулгах уу, газрын эрхийг хүчингүйд тооцох уу, өөр газар нүүлгэн шилжүүлэх үү зэрэг асуудал гарч ирж байгаа юм.

Энэ талаар холбогдох байгууллагынх нь тодорхой арга хэмжээ авч байгаа гэв.

Б.Сэргэлэн