Нийслэлийн захиргаанаас  анх удаа “Иргэний оролцоотой төсөв-2014” хэлэлцүүлэг зохион байгуулж  энэ оны төсвийг болосвруулахдаа нийслэлийн 152 хорооны 318 мянган өрхөөс санал авахад иргэдийн дийлэнх нь бичил бизнес хэрэгжүүлэх хүсэлтэй байгаагаа илэрхийлжээ. Тиймээс иргэдийн саналыг үндэслэн “Бичил бизнесийг дэмжих, ядуурлыг бууруулах нийслэлийн хөтөлбөр”-ийн төслийг өчигдөр болсон нийслэлийн удирдлагын зөвлөлийн ээлжит хуралдаанаар хэлэлцсэн юм. Уг хөтөлбөрийг санхүүжүүлэхэд нийслэлийн 2014 оны төсөвт 15,2 тэрбум төгрөгийг төсөвлөсөн бөгөөд нийслэлийн 152 хороонд дунджаар 100 сая төгрөг, цаашлаад хэрэгцээнээсээ хамаарч 200-300 сая төгрөгөөр төсөл хэрэгжүүлэхээр төлөвлөөд байгаа ажээ.  Харин энэхүү санхүүжилтийг хэрхэн хуваарилах, ямар зарчмаар явагдах талаар зохицуулалт хийсэн нэгдсэн хөтөлбөрийг нийслэлийн хөдөлмөрийн газар зэрэг холбогдох албаныхан боловсруулсан бөгөөд хөтөлбөрийг боловсруулахдаа иргэдийн бичил зээлд хамрагдах шаардлагатай эсэхийг тодруулсан судалгааг өргөн хүрээнд явуулсан байна.