Дэлхийн Оюуны Өмчийн Байгууллага (ДОӨБ)-ын Ерөнхий Ассамблейн 58 дугаар чуулган Женев хотноо есдүгээр сарын 24-нөөс аравдугаар сарын 2-ны өдрүүдэд хуралдаж амжилттай өндөрлөлөө.

Чуулганы хуралдаанд Монгол улсыг төлөөлж Оюуны өмчийн газрын дарга Э. Эрдэнэсүрэн, Монгол Улсаас Нэгдсэн Үндэстний Байгууллага (НҮБ)-ын Женев дэх төв болон олон улсын бусад байгууллагын дэргэд суугаа Байнгын төлөөлөгч, Элчин сайд Л.Пүрэвсүрэн, ОӨГ-ын Аж үйлдвэрийн өмчийн хэлтсийн дарга С. Урангэрэл нар оролцов.

Оюуны өмчийн газрын дарга Э.Эрдэнэсүрэн 9 дүгээр сарын 25-ны өдрийн нэгдсэн хуралдаанд үг хэлж оролцов. Тэрээр хэлсэн үгэндээ Патентын хамтын ажиллагаа, Мадрид болон Гаагийн системийг төгөлдөржүүлэхэд Дэлхийн оюуны өмчийн байгууллагаас явуулж буй бодлогыг өндрөөр үнэлж, Монгол улсын Оюуны өмчийн газарт хэрэгжүүлсэн аж үйлдвэрийн өмчийн удирдлагын автоматжуулсан системийн төсөл Дэлхийн оюуны өмчийн байгууллагын дэмжлэгтэйгээр амжилттай өндөрлөснийг дурдаад Монгол улсад хэрэгжүүлж эхлээд буй “Монголын оюуны өмчийн газрын нөөц ба менежментийн дүн шинжилгээ хийх төсөл” болон бусад төсөл, хөтөлбөрүүд амжилттай хэрэгжинэ гэдэгт итгэл дүүрэн байгаагаа илэрхийллээ.

Чуулганы үеэр Оюуны өмчийн газрын дарга Э.Эрдэнэсүрэн тэргүүтэй төлөөлөгчид Дэлхийн Оюуны өмчийн байгууллагын Ерөнхий захирал Фрэнсис Гарритай уулзаж, Оюуны өмчийн газрын өнөөгийн байдал, цаашдын төлөвлөгөөний талаар танилцуулсан ба 2019 онд тохиох Монгол Улс Дэлхийн оюуны өмчийн байгууллагын гишүүн орон болсоны 40 жилийн ойг тохиолдуулан хамтарсан арга хэмжээ зохион байгуулах асуудлаар санал нэгдэв.

Мөн Ерөнхий захирлын орлогч ноён Ёо Такаги, хатагтай Ван Бинин болон ноён Минелик Гетахун, Ази номхон далайн бүсийн газрын дарга Эндрю Онг, Зохиогчийн эрхийн хөгжлийн хэлтсийн дарга хатагтай Гао Хан нартай уулзаж цаашдын хамтын ажиллагааны талаар санал солилцлоо.