Монгол Улсын гавьяат тамирчин, харүмафүжи Д.Бямбадоржийн зодог тайлах ёслол өнгөрсөн сарын сүүлчээр болж өнгөрсөн билээ.

Тэрбээр 2017 оны аравдугаар сарын 26-нд Тоттори хотод өөрөөсөө зиндаа доогуур, нутаг нэгт сумоч Таканоива А.Баасандоржийг гэмтээсэн хэрэгт холбогдож, улмаар өөрийн хүсэлтээр зодог тайлах шийдвэрийг өнгөрөгч оны арваннэгдүгээр сард гаргаж байсан билээ.

Д.Бямбадорж хэлэхдээ “Таканоиваг гэмтээсэндээ ёкозүнагийн хувьд хариуцлага хүлээж, зодог тайлж байгаагаа зарлаж байна. Японы ард түмэн, Японы сумо бөхийн холбоо, намайг дэмждэг бүх хүмүүсээс  уучлал гуйж байна” хэмээсэн байдаг.

Мөн Тоттори хотын захиргаанаас Харүмафүжиг 500 мянган иенээр торгож байсан. Гэсэн ч Таканоива А.Баасандоржид түүний энэхүү үйлдэл хангалттай санагдахгүй байгаа бололтой.

Таканоива А.Баасандорж хоёр тэмцээн өнжсөн болон сэтгэл санааны хохирол, эмнэлгийн зардлын болон замын зардлын төлбөр зэрэг шалтгаанаар дахин 30 сая иений нөхөн төлбөр шаарджээ. 

Хэрэв шүүхээс гадуур тохиролцож чадахгүй бол Харүмафүжи аваргыг шүүхэд өгөх гэнэ. Хоёр талын өмгөөлөгчид харилцан тохиролцоонд хүрээгүй учир иргэний шүүхээр уг асуудлыг шийдвэрлэхээр болжээ. Энэхүү мөнгийг Таканоива А.Баасандорж хоёр сарын өмнөөс нэхэмжилсэн байна.