Талбайн теннисний энэ оны анхны “Их дуулга” болох “Австралийн нээлттэй тэмцээн” Австралийн Мельбурн хотноо өчигдөр  эхэллээ. Тэмцээн энэ сарын 29 хүртэл үргэлжлэх бөгөөд дэлхийн шилдэг теннисчид ганцаарчилсан, хосын болон холимог хосын төрөлд оролцож байна. 1905 оноос эхтэй тус тэмцээний энэ жилийн шагналын сан 33 сая ам.доллар ажээ. Тэмцээний ганцаарчилсан төрлийн нэгдүгээр тойргийн тоглолтууд эхэлсэн бөгөөд 1/32-т шалгарах эрхийн төлөөх тоглох теннисчид тодроод байна. Тус тэмцээний 2003 оны дэд аварга, “Их дуулга” тэмцээний долоон түрүүт, АНУ-ын нэр теннисчин Винус Уильямс хоёрдугаар тойрогт шалгарч чадсангүй. Тэрээр эхний тойрогт 22-т эрэмбэлэгдэж  буй ОХУ-ын Екатарина Макаровтой оноолт таарч, ялагдал хүлээжээ.