Талбайн теннисний энэ оны анхны “Их дуулга” болох “Австралийн нээлттэй тэмцээн” Австралийн Мельбурн хотноо өнгөрсөн Даваа гарагт  эхэлсэн. Тэмцээн энэ сарын 29 хүртэл үргэлжлэх бөгөөд дэлхийн шилдэг теннисчид ганцаарчилсан, хосын болон холимог хосын төрөлд оролцож байна. Эмэгтэйчүүдийн ганцаарчилсан төрөлд түрүүлэх магадлалтай теннисчдийн тоонд зүй ёсоор багтаж буй ОХУ-ын Мария Шарапова хүндхэн тоглолтоос дараагийн тойрогт шалгарлаа. Тэрбээр хоёрдугаар тойрогт тус тэмцээнд хоёрдугаар тойргоос хэтэрч байгаагүй Италийн Карин Кнапптай учраа таарч, гурван цаг 45 минут үргэлжилсэн тоглолтод буулган авснаар 1/32-д шалгарлаа.