Өнөөдөр үдээс өмнө УИХ-ын дарга З.Энхболд улсын сайн малчин, тариаланч, улсын тэргүүний малчдын бүлэг, фермер хамт олноор шалгарсан хүмүүстэй уулзалт зохион байгуулж, нийт 77 иргэнийг шагнаж урамшууллаа. Тус арга хэмжээнд УИХ-ын зарим гишүүд, УИХ-ын даргын ахлах зөвлөх С.Ламбаа, Үйлдвэр, хөдөө аж ахуйн дэд сайд Ц.Туваан нар оролцсон юм. Өмнөх жилүүдэд үдэж буй жилийнхээ ажлыг сар шинийн баярын өмнөхөн дүгнэж, улсын сайн малчин, тариаланчийг тодруулан шагналыг орон нутагт нь очиж гардуулдаг байсан. Харин өнгөрсөн жилээс хөдөө аж ахуйн салбарт тэргүүлэгчдийг Улаанбаатар хотод урьж шагналыг гардуулдаг болсон билээ. Баярын хурлын үеэр  УИХ-ын дарга З.Энхболд тэргүүлэгчдэд хандан малынхаа тоо толгойг өсгөж, тариалан эрхлэлтээрээ нутагтаа тэргүүлсэн малчин, тариаланчдад баяр хүргээд мал аж ахуйн бүтээгдэхүүний үйлдвэрлэлийг орон нутагт амжилттай хөгжүүлж, өрхийн орлогыг нэмэгдүүлэх, ядуурлыг бууруулах зэрэг төрийн бодлогыг хэрэгжүүлж үр дүн гаргаж байгаа ажилд нь улам их амжилт хүссэн юм.