УИХ-ын 2013 оны намрын ээлжит чуулганы хугацаанд Эдийн засгийн байнгын хороо 24 удаа, төсөл хэлэлцүүлэгт бэлтгэх болон хяналтын чиглэлээр байгуулагдсан хорооны ажлын хэсэг 80 гаруй удаа хуралджээ.

Энэ  хугацаанд  давхардсан тоогоор 60 гаруй асуудал хэлэлцэж,  40 орчим санал, дүгнэлт, танилцуулга бэлтгэн гаргаж, нэгдсэн хуралдаанаар хэлэлцүүлэн шийдвэрлүүлсний зэрэгцээ хуулийн төслүүдийг Байнгын хороо болон чуулганы хэлэлцүүлэгт бэлтгэх чиглэлээр 10 гаруй ажлын хэсгийг байгуулан ажилласан байна.

 

Чуулганы хугацаанд тус байнгын хороогоор хэлэлцэгдсэн 23 хууль, 9 тогтоолыг эцэслэн батлуулж, олон улсын 3 гэрээ, хэлэлцээрийн төслийг зөвшилцөж, 2 хуулийн төслийн хэлэлцэх эсэхийг шийдвэрлэж, Газрын тосны тухай хуулийн шинэчилсэн найруулга, түүнийг дагалдсан 11 хуулийн төслийн эцсийн хэлэлцүүлгийг хийж, чуулганы нэгдсэн хуралдаанаар оруулахад бэлэн болгожээ. Ээлжит чуулганы хугацаанд батлагдсан нийт 32 хууль, бусад шийдвэрийн дөрөв нь шинэчилсэн найруулга буюу шинээр батлагдсан хууль, 19 нь нэмэлт, өөрчлөлт оруулсан болон хүчингүй болгосон хууль, 9 нь УИХ-ын тогтоол байсан аж.

Ер нь тус хорооноос зохион байгуулсан ажлын дийлэнх нь инфляцийг нам, тогтвортой түвшинд байлгах, макро эдийн засгийн болон санхүүгийн салбарын тогтвортой байдлыг бэхжүүлэхэд чиглэсэн байна.

 

Эдийн засгийн дархлааг сайжруулах зорилтын хүрээнд төрөөс мөнгөний бодлогын талаар 2014 онд баримтлах үндсэн чиглэлийг тодорхойлж, хөрөнгийн зах зээлийн хөгжлийг түргэтгэх, гадаадын хөрөнгө оруулалтад таатай нөхцөл бүрдүүлэх, хөрөнгө оруулалтын үр өгөөжийг нэмэгдүүлэх, эрдэс баялгийн салбарын бодлогыг тодорхойлоход анхаарч ажиллалаа.