Тус төсөл нь хадгаламж, зээлийн хоршоодын чадавхийг бэхжүүлэх, иргэдийн санхүүгийн боловсролыг дээшлүүлэх замаар санхүүгийн үйлчилгээний хүртээмжийг нэмэгдүүлэх зорилготой бөгөөд уг зорилгын хүрээнд хийгдсэн судалгааны үр дүнд тулгуурлан санхүүгийн бүтээгдэхүүн, үйлчилгээний талаарх ойлголт, мэдээллийг телевизийн олон ангит киногоор дамжуулан иргэдэд хүргэхээр болсон.

Уг ажлын хүрээнд 26 ангит киноны зохиолч шалгаруулах уралдаан зарласан бөгөөд уралдаанд нийт 11 зохиолч зохиолын синопсис буюу ерөнхий санаагаа ирүүлснээс зохиолч А.Миеэгомбын ирүүлсэн санал шалгарчээ.

Санхүүгийн зохицуулах хороо болон төслийн зүгээс  киног чанарын өндөр түвшинд бүтээхийн тулд кино бүтээх студи, продакшныг шалгаргуулах ажлыг хоёр үе шаттайгаар явуулна. Нэгдүгээр шатанд нийт гурван байгууллагыг шалгаруулж сонгогдсон зохиолчийн зохиолоор киноны эхний хоёр ангийг бүтээлгэнэ. Үүний дараа шалгаруулалтын хоёрдугаар шат явагдах бөгөөд кино тус бүрийг МҮОНТВ болон арилжааны телевизүүдээр дамжуулан иргэдийн хүртээл болгож аль студи, продакшны хувилбар нь илүү ойлгомжтой, хүртээмжтэй хэлбэрээр бүтээгдсэнийг олон нийтийн санал асуулгаар шалгаруулах юм. Шалгарсан студи, продакшн үлдсэн 24 ангийг хийх эрхийг авах ажээ.