“Хайрын виз” уянгын драмын жүжиг цоо шинэ өнгө төрхтэйгээр 13 жилийн дараа дахин үзэгчдийн хүртээл болоод байна.

Уг жүжиг энэ сарын 6-нд үзэгчдэд хүрсэн бөгөөд 22, 23-нд УДЭТ-ын тайзнаа дахин тоглогдох аж.

Уг жүжиг нь Монгол Улсын соёлын гавьяат зүтгэлтэн, сэтгүүлч Ц.Балдорж агсны зохиол бөгөөд ерөнхий найруулагчаар М.Батболд, продюсерээр, Монгол Улсын урлагийн гавьяат зүтгэлтэн, дээрх театирын захирал Д.Цэрэнсамбуу, зөвлөх найруулагчаар Монгол Улсын урлагийн гавьяат зүтгэлтэн Ч.Найдандорж ажиллажээ.

Өмнө нь С.Болд-Эрдэнэ, Г.Амгаланбаатар, Д.Ганцэцэг нар гол дүрд тоглож байсан бол энэ удаа залуу жүжигчин Т.Сэргэлэн, О.Майдарравжаа, П.Мягмарсүрэн, Ц.Цэлмүүн болон Монгол Улсын гавьяат жүжигчин Ж.Оюундарь, жүжигчин М.Түвшинхүү нар тоглож байна.  

“Хайрын виз” уянгын драмын жүжиг хайр сэтгэлийн ариун явдалд нийгэм, хүмүүсийн нөлөө хэрхэн гүн тусаж, хүмүүс бие биеэсээ хэрхэн төөрч, жинхэнэ хайр сэтгэлээсээ холдож болох тухай өгүүлдэг юм.