Манай хойд хөрш ОХУ-ын Екатеринбург хотноо болж буй сонирхогчдын боксын ДАШТ-д 57 кг-н жинд өрсөлдөж буй манай тамирчин Э.Цэндбаатар өчигдөр эхний өрсөлдөгчөө хожиж дараагийн шатанд шалгарлаа.

“Жакарта-2018” Азийн наадмын алт, 2019 оны ААШТ-ий аварга Э.Цэндбаатар анх удаагаа ДАШТ-д оролцож байгаа бөгөөд түүний эхний өрсөлдөгч нь Киргизстаны боксчин Мунарбек Сейтбек Уулу байсан юм. Тэрээр тэмцээний эхний шатанд хийлээд байсан бол дараагийн шатанд Киргизстаны боксчинтой тулалдаж таван шүүгчийн санал нэгтэйгээр 5-0 харьцаатай ялалт байгуулж 3-р шатанд шалгарлаа.

Дэлхийн аваргын эхний тулаанаа амжилттай хийгээд буй залуу тамирчин Э.Цэндбаатарын дараагийн өрсөлдөгч нь Унгарын боксчин Роланд Галос байх юм. Хэрвээ манай боксчин 17-ны өдөр Унгарын боксчинг хожиж чадвал шөвгийн наймд Ирланд болон Канадын тамирчдын хожсонтой нь тулалдана.

Өнөөдөр тэмцээний 69 кг-н жинд өрсөлдөж буй Г.Баярхүү дэлхийн аваргын эхний тулаанаа хийнэ. Түүний эхний өрсөлдөгч нь Тайваны Пан Хунг-мин байх юм. Тайвань боксчин тэмцээний нэгдүгээр шатанд Украйны боксчинг 3-2 харьцаатай хожиж хоёрдугаар шатанд манай боксчинтой таарч байна.