Архангай аймгийн Эрүүл мэндийн газар, Францын Санте Сюд ТББ-ын хамтран хэрэгжүүлж байгаа “Эсэн мэнд амаржихуй” төслийн санхүүжилтээр нийт 59 сая төгрөгийн өртөг бүхий “Эх, хүүхдэд үзүүлэх яаралтай тусламж үйлчилгээний нэн шаардлагатай багаж, хэрэгслийн цомог цүнх”-ийг хөдөөгийн 78 багийн бага эмчид гардууллаа. 

Дээрх арга хэмжээний хүрээнд яаралтай тусламжийн сургагч багшийг урьж амилуулах суурь тусламжийн талаар хоёр өдрийн сургалтыг багийн эмч нарт хийсэн байна. “Эх, хүүхдийн эрүүл мэндийг дэмжих жил”-ийн ажлыг эхлүүлсэн энэ үед орон нутгийн иргэдэд эрүүл мэндийн суурь тусламжийг анхлан үзүүлдэг багийн бага эмч нартаа “Эх, хүүхдийн яаралтай тусламжийн цомог бүхий цүнх”-ээр хангаж, сургасан нь цаг үеэ олсон, оновчтой, үр дүнтэй ажил болж байна гэж багийн эмч нар дүгнэлээ.