Мөн өдрөө Хууль зүйн яамны Төрийн нарийн бичгийн дарга Ж.Баярцэцэг Лондон хотын Цагдаагийн газар, Британийн Хилийн албаны Гадаад улстай харилцах алба, Британийн Гэмт хэрэгтэй тэмцэх үндэсний газар, Британийн Дотоод хэргийн яамны Аюулгүй байдлыг хангах тоног төхөөрөмж үйлдвэрлэлийн асуудал эрхэлсэн болон Британийн худалдаа, хөрөнгө оруулалтын газрын Батлан хамгаалах, аюулгүй байдлын хэлтсийн Зүүн Ази, Америк, Австралийн асуудал хариуцсан захирал,  мэргэжилтнүүдтэй уулзжээ.

 

Уулзалтаар Төрийн нарийн бичгийн дарга Монгол Улсад хэрэгжүүлж буй хууль эрх зүйн болон хууль сахиулах байгууллагуудын шинэчлэлийн талаар дэлгэрэнгүй танилцуулж, Британийн холбогдох албатай холбоо тогтоох, туршлага судлах, мэргэжилтэн бэлтгэхэд дэмжлэг үзүүлэх хүсэлт тавив. Британийн Дотоод хэргийн яам болон Гэмт хэрэгтэй тэмцэх үндэсний газраас Төрийн нарийн бичгийн даргын хүсэлтийг хүлээн авч цаашид хамтарч ажиллах сонирхолтой байгаагаа илэрхийллээ.

 

Мөн өдрийн үдээс хойш Британийн Хуульчдын нийгэмлэгийн болон Британи дахь хуульчдын холбоодын төлөөлөлтэй уулзсан байна. Уулзалтын үеэр Британи дахь хуульчдын эрх зүйн байдал, тэдний үйл ажиллагаа, хуулийн боловсрол олгох тогтолцоо болон Монгол Улсад шинээр байгуулагдсан Хуульчдын холбоо, түүний эрх зүйн байдлын талаар уулзалтад оролцогсод санал бодлоо солилцож, цаашид Британийн хуульчид болон Монгол Улсын хуульчдын хооронд холбоо тогтоох, хамтын ажиллагааг өргөжүүлэхэд чиглэсэн тодорхой алхмууд хийхээр тогтжээ. Манай төлөөлөгчдийн айлчлал үргэлжилж байна.