Монгол Улсын Ардчилсан, шинэ Үндсэн хууль батлагдсаны 28 жилийн ой, Монгол Улсын Үндсэн хуулийн өдөрт зориулсан чансаа өндөр 128 бөхийн барилдаан өчигдөр Монгол бөхийн өргөөнд болж, Завхан аймгийн Яруу сумын харьяат, аймгийн заан, чөлөөт бөхийн ОУХМ М.Лхагвагэрэл түрүүлсэн билээ. Иймд түүнээс цөөн асуултад тодруулга авсан юм.

-Өчигдрийн барилдаанд түрүүлсэнд баяр хүргэе. Хамгийн хүнд барилдаанаа та хэнтэй хийсэн бэ?

-Монгол Улсын харцага О.Хангайтай хийсэн барилдаан хамгийн хүнд байсан. Гэхдээ багшийнхаа хэлснээр барилдаж, түрүүлсэндээ баяртай байна.

-Үндэсний бөхийн гараагаа хэзээнээс эхлүүлсэн бэ?

-“TV9” телевизээс зохион байгуулдаг “Аваргын гараа” барилдаанд анх 10 настайдаа оролцож байсан. Тэр цагаас хойш бөхийн спортод улам шимтэх болсон. Тухайн үед өдгөө аймгийн харцага цол хүртээд байгаа Дундговь аймгийн Баянжаргалан сумын харьяат Б.Одсүрэнтэй хамт оролцож байлаа. Миний бие уг барилдаанд дөрвөн удаа зодоглохдоо нэг алт, хоёр хүрэл медаль хүртсэн.

-Өдгөө “Аварга” биеийн тамирын дээд сургуулийн багш, дасгалжуулагчийн ангид сурч байгаа бөгөөд энэ жил төгсөх юм билээ. Харин бэлтгэл сургуулилтаа Монгол Улсын начин Адъяахүүгийн удирдлага дор хийдэг. Багштайгаа хэрхэн холбогдсон бэ?

-2007 оны “Аваргын гараа” тэмцээний үеэр багш намайг анх харж, шавиа болгосон. “Аварга” биеийн тамирын дээд сургуульд ч орох санал тавьсан. Тэр барилдаанд нийт 32 хүүхэд барилдаж байсан.

-Аймгийн заан цолоо хэдэнд онд хүрсэн бэ?

-Аймгийнхаа 2018 оны баяр наадамд хүч үзэж хүртсэн. Харин өнгөрсөн жил баталсан.

-Таны аав ч мөн адил аймгийн заан цолтой юм билээ. Ингэснээр аавынхаа цолонд хүрсэн нь билэгдэлтэй юм. Гэхдээ мөрөөдөж байгаа улсын цол гэвэл ...

-Тийм ээ, аавынхаа цолонд хүрсэндээ баяртай байдаг. Манай аав 1996 онд Завхан аймгийнхаа баяр наадамд хүч үзэж, дээрх цолыг хүртсэн. Гэхдээ би Монгол Улсын аварга цол хүртэхийг хүсдэг. Тэгэхийн тулд улам хичээх болно оо.

-Ээжийн тань талд бөхийн удам бий юу?

-Ээжийн талд Завхан аймгийн Эрдэнэхайрхан сумын харьяат, Монгол Улсын начин Гэлэгийн Дайнаа гэж бөх байсан гэж сонссон. Мөн сумын заан Ягаан гэж хүн байдаг.

-2016 онд өсвөр үеийн улсын аварга болж байсан санагдана ...

-Тийм. Тухайн үед одоо улсын начин цол хүртээд байгаа Б.Орхонбаяр, аймгийн арслан Б.Лхагвадорж нартай өрсөлдөж байлаа.

-Чөлөөт бөхийн төрөлд анх удаа ямар тэмцээнд оролцож байсан бэ?

-Чөлөөт бөхийн төрлөөр анх удаа 2015 онд залуучуудын УАШТ-д оролцсон ч медаль хүртэж чадаагүй.

-Гэхдээ өнгөрсөн жил болсон чөлөөт бөхийн 23 хүртэлх насны ДАШТ-ээс хүрэл медаль хүртэж, Монголын чөлөөт бөхийн түүхэнд хүнд жинд дэлхийн дэвжээнээс медаль хүртсэн анхны тохиолдол болсон шүү дээ ...

-Тийм. Энэ бол багшийн минь л надад зааж сургасны ач тус. Мөн залуучуудын 23 хүртэлх насны Азийн АШТ-ээс мөнгөн медаль хүртэж байсан.

-Одоо таныг ямар тэмцээн хүлээж байгаа вэ?

-Чөлөөт бөхийн төрөлд энэ сарын 23-нд эхлэх Иван Ярыгины нэрэмжит тэмцээн Красноярск хотод болсон. Үүнд оролцоно доо.

-Харин “Токио-2020” олимпийн эрх олгох тэмцээндээ хэзээ өрсөлдөх вэ?

-Азийн олимпийн эрх олгох тэмцээн ирэх гуравдугаар сарын 27-29-нд БНХАУ-ын Шиань хотод болно. Мөн дөрөвдүгээр сард өөр нэг тэмцээн хүлээж байгаа. Олимпийн эрхийн төлөөх тэмцээний хамгийн чанга өрсөлдөгчид Ираны бөх. Учир нь энэ улсаас 120 кг-д олимпийн эрх авсан тамирчин байхгүй. Би алт эсвэл мөнгөн медаль хүртвэл олимпод оролцох эрхтэй болно.

-Спортын бусад төрлөөр хичээллэдэг үү?

-Сагсан бөмбөг тоглох дуртай. Ер нь аль ч спортоор хичээллэх сонирхолтой.

-Ярилцсанд баярлалаа.