Хөтөлбөрийг 2014-2020 он хүртэл гурван үе шаттайгаар хөгжүүлэхээр төлөвлөж байгаа аж. Хөтөлбөр хэрэгжиж эхэлснээр нийслэлээс үзүүлж байгаа барилгын зөвшөөрөл, газар эзэмших, өмчлөх, тендерийн сонгон шалгаруулалт, иргэний бүртгэлийн үйлчилгээ гэх мэт 540 гаруй үйлчилгээг иргэд гэрээсээ, ажил дээрээсээ амар хялбар, ойлгомжтой байдлаар авах боломж бүрдэх аж.  

 

Ухаалаг засаглал, Ухаалаг эдийн засаг, Ухаалаг иргэд, Ухаалаг үйлчилгээ, Ухаалаг орчин, Ухаалаг амьдрал гэсэн зургаан чиглэлээр Ухаалаг Улаанбаатар хотыг бүрдүүлнэ гэж үзжээ. Хөтөлбөрийг хэрэгжүүлэхдээ 2014-2016 онд Цахимжсан Улаанбаатар, 2015-2018 онд Технологижсон Улаанбаатар, 2016-2020 онд Ухаалаг, ногоон, хөгжингүй Улаанбаатар гэсэн шатлалтайгаар хэрэгжүүлэх юм байна. 

 

Тус хөтөлбөр нь шинэ зууны хотын хөгжлийн чиг хандлага, технологийн дэвшил, иргэдийн хүсэл шаардлага, бизнесийн орчны өөрчлөлт зэргийг оновчтой шийдвэрлэж байх цомхон бүтэцтэй, ойлгомжтой дүрэм журамтай, соёлтой шуурхай үйлчилгээтэй ухаалаг хотыг бий болгох зорилготой гэж нийслэлийн удирдлагууд мэдэгдэж байна. 

Энэхүү хөтөлбөрийг батласнаар нийслэлийн иргэд 400 гаруй төрлийн үйлчилгээг нэг цонхоор, цахимаар авдаг болж,  иргэдийн оролцоог хангасан, шууд ардчиллыг хөгжүүлсэн, авлигагүй, сайн засаглал бүхий Ухаалаг Улаанбаатар хотыг хөгжүүлэх боломжтой болох ажээ.