Коронавирусын COVID-19 тархалтаас урьдчилан сэргийлэх, эрсдлийг бууруулах хүрээнд Монгол Улсын Засгийн газар, Улсын Онцгой комисс 2 дугаар сарын 26-ны өдрийн хуралдаанаар Монгол Улс, Япон Улс хоорондын зорчигч тээврийн бүх нислэгийг 3 дугаар сарын 11-ний өдрийг дуустал түр хугацаагаар цуцлаад байна.

Энэ хугацаанд Япон Улсад түр хугацаагаар оршин суух визийн хугацаа дуусаж буй аялал жуулчлалын “J” визтэй иргэд дараах баримт бичгийг бүрдүүлж, хамгийн ойр байрлах Цагаачлалын албанд өөрийн биеэр очиж виз сунгалтаа мэдүүлнэ. Дараах бичиг баримтыг бүрдүүлж очиход анхаарна уу. Үүнд:

• Гадаад паспорт
• 3х4 хэмжээтэй цээж зураг /1 ширхэг/
• Виз сунгуулахыг хүссэн анкет / http://www.moj.go.jp/content/001290197.pdf/
• Виз сунгалтын төлбөр 4,000 иен
• 2/28-3/11-ний хооронд явах нисэх онгоцны тийз /урьдчилсан байдлаар/

Япон Улсын Цагаачлалын албанаас Таны визийг 15-30 хоногийн хугацаатай сунгана.
Жич: Тус ЭСЯ-ны зүгээс Японы Цагаачлалын албаны холбогдох албан тушаалтнуудтай уулзан, Япон орон даяарх Цагаачлалын албаны орон нутгийн салбаруудад тус улсад богино хугацаагаар зорчиж буй манай улсын иргэдийн визийг зохих журмын дагуу сунгаж өгөх хүсэлтийг хүргүүлээд байна. Иймд Япон Улсад ажлаар болон аялж яваа иргэд Токио дахь Монгол Улсын ЭСЯ болон Осака дахь ЕКГ-т заавал өөрийн биеэр ирэх шаардлагагүй болсныг үүгээр мэдэгдэж байна.

Танд харьяалагдах Япон Улсын Гадаадын иргэн, харьяатын газрын байршлыг дараах холбоосоос авна уу.
http://www.immi-moj.go.jp/english/info/index.html

МОНГОЛ УЛСААС ЯПОН УЛСАД СУУГАА
ЭЛЧИН САЙДЫН ЯАМ