Нийслэлийн аялал жуулчлалын газрын дарга Э.Баттулга,  МОНЦАМЭ агентлагийн захирал А.Баатархуяг нар хамтран ажиллах гэрээнд гарын үсэг зурлаа. Монгол Улсыг гадаадад сурталчлах үүрэг бүхий МОНЦАМЭ агентлаг, нийслэл хотоо гадаадад сурталчлах үүрэг бүхий Нийслэлийн Засаг даргын хэрэгжүүлэгч агентлаг Нийслэлийн аялал жуулчлалын газрын хамтын ажиллагааны гол зорилго нь Монгол Улсыг дэлхийд сурталчлах ажил юм. МОНЦАМЭ агентлагийн захирал А.Баатархуяг  ”... Төрийн ажлын уялдаа холбоог сайжруулах бодлого хэрэгжүүлэхийн тулд хамтран ажиллах шаардлага гарсан.

Манай сайтад сардаа дэлхийн өнцөг булан бүрээс зургаан сая хэрэглэгч ханддаг. Мөн манайх  33 орны 46 агентлагтай хамтран ажилладаг. Тэгэхээр цаашид нийслэлийн аялал жуулчлалын газар энэ сувгийг ашиглан мэдээллээ түгээх боломжтой болж байна” гэлээ.  

Хамтын ажиллагааны хүрээнд нийслэл хотоо дэлхий нийтэд сурталчлан мэдээлэл түгээхээс гадна хамтран аялал жуулчлалын үндэсний брэндийг бий болгох юм байна. Түүнчлэн жуулчдын зорилгод нийцүүлэн аялал жуулчлалын төрөлжсөн хөтөлбөрийг  зургаадугаар сарын нэгэн гэхэд гаргана гэлээ. 

Нийслэлийн аялал жуулчлалын газрын дарга Э.Баттулга “Манай оронд бахархах зүйл олон байдаг. Гэвч гүүглээр Улаанбаатар хот гээд хайхаар Азийн хамгийн бохирдол ихтэй хот, Утаанбаатар гэх мэт сөрөг мэдээлэл илэрдэг. Энэ нь жуулчдад таагүй сэтгэгдэл төрүүлдэг. Ингэж хамтран ажилласнаар манай мэдээлэл жуулчдад эерэгээр хүрэх болно” гэж хэллээ.
Мэдээллийн төгсгөлд Нийслэлийн аялал жуулчлалын газраас бэлтгэсэн өвлийн аялал жуулчлалын сурталчилгааны видеог сэтгүүлчдэд үзүүллээ.