МҮОХ-ны ерөнхийлөгч Н.Түвшинбаяр, “Green Games-2020” наадмыг зохион байгуулагч “Улаанбаатар спорт” менежмент ХК-ийн гүйцэтгэх захирал Б.Тамир нар хамтран ажиллах санамж бичгийг үзэглэлээ.

Энэ үеэр МҮОХ-ны ерөнхийлөгч Н.Түвшинбаяр “Монгол Улсад спортын менежмент хийх, олон улсын тэмцээн уралдаан зохион байгуулах компани байгуулагдсанд сэтгэл өндөр байна. Монгол Улсын ерөнхийлөгчийн ивээл дор зохион байгуулагдах “Олон улсын залуучуудын ногоон наадам” манай улсад зохион байгуулагдах гэж байгаад МҮОХ болон хувийн зүгээс нэн таатай хүлээн авч, хамтран ажиллахад сэтгэл өндөр байгаагаа илэрхийлэх нь зүйтэй байх. Тэр дундаа энэхүү наадмаар дамжуулж хүүхэд залууст хорт зуршлаас сэргийлэх, эх дэлхийгээ хайрлах үзлийг түгээх болон спортын шинэ ордон, хөлбөмбөгийн талбай, усан спортын төв, Мөсөн ордон зэрэг бүтээн байгуулалтын ажлууд өрнөж байгаа нь нэн сайшаалтай хэрэг юм. МҮОХ-ны зүгээс ирэх онд зохион байгуулагдах “Олон улсын залуучуудын ногоон наадам”-ыг бүх талаар дэмжин ажиллах болно” гэдгийг онцоллоо.

Монгол Улсын Ерөнхийлөгчийн ивээл дор, НҮБ-ын "Тогтвортой хөгжлийн зорилго 2030"-ын хүрээнд Монгол Улсад анхлан зохион байгуулагдах “Олон улсын залуучуудын ногоон наадам” ирэх оны есдүгээр сард Монгол Улсад болно. НҮБ-ын гишүүн 190 гаруй улсын тамирчид нээлттэй оролцох уг тэмцээн нь спортын 22 төрлөөр болох юм.

 

 

 

---

	МҮОХ, “Улаанбаатар спорт менежмент” компанитай санамж бичиг байгууллаа
Үзсэн: 1136	Mongolian National Broadcaster