Үүний дараа гишүүд асуулт асууж санал бодлоо хэлж Гадаад харилцааны сайд Л.Болд тайлбар хийсэн юм. Тухайлбал, О.Баасанхүү гишүүн гадаадад томилох консулууд тухайн орныхоо хэлийг мэддэггүй асуудал их гарч байна. Манай улсын иргэд эрх нь зөрчигдөөд очихоор заавал орчуулагчаар дамжуулдаг. Тийм учраас тухайн орны хэлийг мэддэг хүнийг томилж болдоггүй юм уу гэсэн санал гаргасан. Үүнд Л.Болд сайд “Өмнө нь хэлтэй байх гэсэн шалгуур байсан. Одоо бол заавал тийм шаардлага байхгүй. Томилогдсон Элчин сайдууд хууль эрх зүйн мэдлэг өндөртэй байж, иргэдийнхээ эрхийг хамгаалж байх нь чухал” гэж мэдэгдсэн юм.

Харин Ё.Отгонбаяр гишүүн манай орноос гадаадын улс орнуудад элчин сайдын газраа нээхдээ илүү нухацтай хандах хэрэгтэй гээд Индонез улсад манай улсаас 20 хүн, Бразил улсад гурван хүн оршин суудаг, ийм нөхцөлд заавал Элчин сайдын газар нээх хэрэг байна уу гэж асуув. Гадаад харилцааны сайд үүнд манай улс олон улсын байгууллагуудын өмнө хүлээсэн үүрэг болоод дэлхийн ихээхэн хүн амтай улсуудтай найрсаг харилцаа тогтоох нь чухал гэдгийг хэллээ.

 

Түүнчлэн Д.Эрдэнэчимэг гишүүн эмэгтэй консулууд томилогдож байгаад баяртай байгаагаа хэлж тухайн орны сайн засаглал нь эмэгтэй парламентчдын оролцоогоор хэмжигддэг гэдгийг мөн хэлсэн юм.

 

Энэ удаагийн консулуудад Ш.Батцэцэг, Ч.Сосормаа гэх хоёр эмэгтэй сонгогдож байгаа юм.

 

Ч.Сосормаа нь сэтгэл зүйч, судлаач, төрийн захиргааны менежер мэргэжилтэй. 2010 оноос Монгол Улсын Ерөнхийлөгчийн Хүний эрх, иргэний оролцооны бодлогын зөвлөхөөр ажиллаж байгаа бол Ш.Батцэцэг нь  жижиг, дунд бизнесийн удирдлагын менежер, багш мэргэжилтэй. 2009 оноос эхлэн  Монгол Улсын Ерөнхийлөгчийн орон тооны бус зөвлөх, 2013 оноос МҮОНРТ-ийн Үндэсний зөвлөлийн гишүүнээр ажиллаж байгаа ажээ.

 

Уг асуудлыг хэлэлцэх үеэр Ж.Батзандан, Б.Болор, Д.Ганбат, Г.Баярсайхан, Б.Бат-Эрдэнэ, М.Зоригт, Ц.Оюунгэрэл, Р.Бурмаа нар шинээр томилогдож буй эмэгтэй консулуудыг дэмжиж байгаагаа хэлээд өөрийн санал бодлоо илэрхийлсэн юм.

Үүний дараа санал хураалт боллоо. Ингэхэд Ш.Батцэцэгт 70 гишүүнээс 68 гишүүн зөвшөөрсөн бол, Ч.Сосормааг 70 гишүүнээс 69 гишүүн дэмжиж албан ёсоор томилогдлоо.