Үндэсний телевиз
Цагийн хүрд
Найм арваннэг
Бүгд найрамдах Өмнөд Судан Улсад явагдаж буй НҮБ-ын “UNMISS” ажиллагаанд Монгол Улсын Зэвсэгт хүчнээс 850 хүний бүрэлдэхүүнтэй гурав дахь Мотобуудлагын батальон үүрэг гүйцэтгэж байна.
Энэ оны дөрөвдүгээр сарын 14-ний өдөр тус улсын Юнити мужийн Бентью хотын ойролцоох газрын тос олборлох үйлдвэр зэвсэгт босогчдын дайралтад өртөж, ОХУ-ын тав, Украйны нэг, Кени улсын нэг, түүнчлэн орон нутгийн гурван энгийн иргэн шархадсаныг аюулгүй газар татан гаргаж, эмнэлгийн яаралтай тусламжийг үзүүлсэн нь НҮБ-ын мандатаар заагдсан энгийн иргэдийг хамгаалах үүргээ нэр төртэй гүйцэтгэсэн явдал байлаа.
Хүний алтан амь аврах эрсдэлтэй үйл ажиллагааг амжилттай зохион байгуулан явуулсан хурандаа Б.Эрдэнэбат захирагчтай Монгол Улсын Зэвсэгт хүчний гурав дахь Мотобуудлагын батальоны нийт бие бүрэлдэхүүнд Өмнөд Судан Улс дахь НҮБ-ын Энхийг сахиулах тус ажиллагааны Цэргийн Хүчний командлагч Хошууч Генерал Далил Джонсон Саки талархлын захидал илгээсэн байна.
Тэрээр захидалдаа “Хэрэгтэй цагт таны болон танай цэргүүдийн гүйцэтгэсэн шуурхай, шаламгай ажиллагаанд сэтгэл хангалуун байгаагаа тэмдэглэн хэлэхэд таатай байна. Ялангуяа тэдний зоримог чанар, үүргээ чадварлаг гүйцэтгэсэн арга барил болон цагаа олсон, оновчтой хариу үйлдэл зэргүүдэд дахин талархаж буйгаа илэрхийлье. Таны болон танай цэргүүдийн хийсэн энэхүү ажиллагаа нь үнэхээр бахархууштай үйл хэрэг байсан бөгөөд энэ чанараараа бусад орны цэргийн багуудыг араасаа үлгэрлэн дагуулж ажиллахыг та бүгдээс чин сэтгэлээсээ хүсэж байна” гэжээ.
Бүгд Найрамдах Өмнөд Судан улсад өнгөрөгч оны 12 дугаар сараас хойш омог хоорондын мөргөлдөөн үүсч, дотоодын зөрчил тэмцэл хурцдан, хүчирхийлэл газар авч олон мянган иргэд амь үрэгдэж, орон гэрээсээ дайжин дүрвэж байгаа энэ үед Монгол Улсын Зэвсэгт хүчний гурав дахь Мотобуудлагын батальон мандатад заагдсан үүргийнхээ дагуу шаардлагатай бүхий л арга хэмжээг цаг алдалгүй авч хэрэгжүүлэн өөрийн хариуцлагын бүс нутаг, НҮБ-ын цэргийн баазад 9000 орчим энгийн иргэнийг байрлуулан хамгаалалтад аваад байгаа юм.
Өргөсөн тангаргатаа үнэнч цэнхэр дуулгатан Монголын Энхийг сахиулагчдадаа эрүүл энхийг хүсье.
| Судан дахь Монгол цэргүүд дахин гавьяа байгууллаа | ||
| Үзсэн: 5583 | Mongolian National Broadcaster |
Б.Баярсайхан
У.Баярсайхан
М.Золзаяа
Сэтгэгдэл бичих:
АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.