-Монгол Улсын Ерөнхийлөгчийн өргөн барьсан хуулийн төсөл дээр УИХ бүрэн эрхийнхээ хүрээнд энэ хуулийг батлахгүй гэсэн шийдвэр гаргалаа. Би үүнд харамсаж байна. УИХ-ын гишүүд Засгийн газрын гишүүний үйл ажиллагааг давхар хашиж байгаа нь УИХ-ын хэвийн үйл ажиллагаа, УИХ нь Засгийн газартаа хяналт тавих явдалд сөргөөр нөлөөлж байгаа. Тийм учраас энэ асуудлыг шийдэх хэрэгтэй гэсэн байр суурьтай байна. Үүнийг шийдэх боломж байсан. Зарим чиг үүргийн сайд нар нь давхар албаа хашаад үлдсэн сайд нарыг хоёр үе шаттайгаар сольж болох байсан. Тухайлбал эхний ээлжинд гишүүн биш гурван сайдыг оруулаад үүнийхээ дараа дахиад дөрвөн сайдыг солиход Засгийн газрын тавин хувь нь өөрчлөлт ороогүй учраас Засгийн газар огцрох тухай асуудал үүсэхгүй. Ингэж УИХ болон Засгийн газрын үйл ажиллагаа хэвийн явах боломжийг саяны санал хураалтаар хаалаа.

 

Сая харсан байх, Засгийн газрын өөрсдөд нь хамааралтай сайдын асуудалд чуулганы ирц яаж бүрдэж байгааг. Гэтэл УИХ-д үүнээс чухал олон асуудлуудыг хэлэлцэж байхад сайд нар ингэж ирдэггүй. Чухал асуудлуудад санал хурааж байхад өглөө ирж ирцээ бүртгүүлсэн суудал нь онгорхой сайд нараас болоод татгалзсан гэдэг шийдвэр гардаг. Үүнээс болж олон асуудал унаж байсан. Сайд нарын ажилдаа ирдэггүйгээс болж УИХ-ын хэвийн үйл ажиллагаа алдагддаг. Ерөнхийлөгчийн ухаалаг төрийн санал санаачилгыг дэмжээгүйд би харамсаж байна.

 

- Намаас хөөх асуудал дүрэм, журмын дагуу явагддаг. Үүнийг Үндэсний зөвлөлдөх хороо, Намын их хуралдаж байж шийдэх байх. Намын цөөхөн хэдэн дарга нарын үгийг дагасангүй гээд УИХ-ын гишүүний бүрэн эрхэд халдах гэж байгаа бол тийм юм байхгүй. УИХ-ын гишүүн бол ард түмний төлөөлөгч учраас өөрсдийнөө дур зоргоор халж сольдог зүйл байдаггүй юм.