-Үндсэн хуулийн 29.1-д УИХ-ын гишүүн Засгийн газрын гишүүний албыг давхар хашиж болно гэсэн заалт байгаа. Үүнийг нь УИХ-ын гишүүн Ерөнхий сайдаас бусад хуулиар тогтоосон үүрэгт үл хамаарах ажил албан тушаалыг хавсарч болохгүй гэж өөрчилсөн хуулийн төсөл боловсруулсан. Бие даагчид болон миний бие Үндсэн хуульд нэмэлт өөрчлөлт оруулж "давхар дээл"-ний асуудлыг төгс шийдэх хувилбарыг оруулж ирж байгаа юм.

 

-Бид хуулийн хэрэгжих хугацааг тавиагүй. УИХ хэлэлцүүлгийнхээ явцад хугацааг тавьж болох байх гэж бодож байна.

 

-Үндсэн хуульд нэмэлт өөрчлөлт оруулах журмын тухай хууль 2012 онд батлагдсан. Бид дөрөв энэ хуулийг анх удаа хэрэглэж байгаа юм. Уг хуулийн дагуу Үндсэн хуульд өөрчлөлт оруулж байгаа талаар иргэд олон нийтийн саналыг авах ёстой. Бид дөрөв энэ хуулийн төслийн талаарх иргэдийн санал бодлыг өөрсдийн албан ёсны вэб сайтаараа дамжуулж авна.

 

-Гишүүдийн "давхар дээл"-ийг тайлах талаар оруулж байгаа энэ нэмэлт өөрчлөлт бол Үндсэн хуульд нэмэлт өөрчлөлт оруулах журмын тухай хуулийн 1.3-д зааснаар Монгол Улсын Үндсэн хуулийг бүхэлд нь хянан үзэж шинээр батлахтай холбогдсон харилцааг зохицуулахгүй. Тэгэхээр Үндсэн хуулийг бүхэлд нь өөрчлөх гэсэн миний үзэлтэй зөрчилдөхгүй байгаа учраас бие даагчидтай нэгдсэн. Хэрвээ бидний өргөн барьсан хуулийн төсөл батлагдвал Үндсэн хуульд нэмэлт өөрчлөлт оруулах журмын тухай хуулийн дагуу найман жил энэ заалтад өөрчлөлт оруулахгүй.

 

   

 

-Монгол улсын Ерөнхийлөгчийн зүгээс УИХ-ын гишүүн Засгийн газрын гишүүний албыг давхар хашиж болохгүй тухай хуулийн төслийг УИХ-д өргөн барьсан. Энэ хуулийн төслийг УИХ-аар хэлэлцэж сүүлдээ улс төржилт нь хэтрээд жүжиг болж хувирсан. Ер нь өнгөрсөн долоо хоногт хэлэлцүүлгийн явцад яригдаж байсан гишүүдийн 30 хувь нь "давхар дээл"-тэйгээ үлдсэн бол цаашдаа Засгийн газрын гишүүд 100 хувь давхар алба хашиж үлдэх байсан. Үүнийг зөвхөн Үндсэн хуульд өөрчлөлт оруулах замаар л хийж болно. Ийм учраас УИХ-ын гишүүн С.Ганбаатар, Ц.Даваасүрэн, Г.Уянга бид дөрөв үндсэн хуульд өөрчлөлт оруулах хуулийн төслийг өргөн барьж байгаа юм. Уг хуулийн төслийг өнөөдөр Засгийн газар болон Ерөнхийлөгчид санал авахаар хүргүүлнэ. 1992 оны Үндсэн хуульд ингэж давхар алба хашдаг заалт байгаагүй. 2000 онд оруулсан Үндсэн хуулийн дордуулсан долоон өөрчлөлтийн нэг нь энэ. Тэр үеэс сонгууль болгоноор яамдын тоо улам нэмэгдсэн. Бялуу хуваах зарчим үйлчилж сайд нарын тоо ихсэж, ажил үүргийн хуваарь нь давхцаж эхэлсэн. Олон яамдууд салж хоёр болсон. Энэ бүхэн төрийн тогтолцооны гажуудлыг бий болгож байгаа юм. Манай улсад гаднаасаа сайд нар нь томилогддог 10 яам л байхад болно. Тэгэхээр тогтолцооны энэ гажуудлыг халахын тулд бидний өргөн барьж байгаа Үндсэн хуулийн өөрчлөлт хамгийн чухал арга гэдгийг хэлмээр байна.