Бүлгийн хуралдаанаар Ашигт малтмалын тухай хуульд нэмэлт, өөрчлөлт оруулах, Хяналтын тухай хуулийн шинэчилсэн найруулга болон Эдийн засгийг эрчимжүүлэх тогтоолын төсөл мөн шинэ төмөр зам барих тогтоолын төслийг хаалттай хэлэлцсэн байна.

 

Бүлгийн дарга Д.Эрдэнэбат хэлэлцсэн асуудлуудын талаар товч мэдээлэл өгсний дараа сэтгүүлчдийн асуултад хариулсан юм.

 

- Засгийн газар төсвийн тодотголоо оруулж ирэх ёстой. Төсвийн тодотголоор яамдын асуудлыг хэрхэн оруулж ирэх нь тэдний бүрэн эрхийн асуудал. Ер нь бол манай гишүүдийн олонх нь Засгийн газрынхаа бүтэц зохион байгуулалтыг цомхон байгая гэдэг саналыг гаргаж байгаа. Энэ асуудлыг ярилцана. Гэхдээ хугацааны хувьд ямар нөхцөлд яаж шийдэх гэдэг нь хүлээгдэж байгаа зүйл гэж хэлж болно.

 

-Засгийн газраас Х.Баттулга сайдын асуудлаар УИХ-д асуудал оруулж ирсэн нөхцөлд Ардчилсан намын бүлэг яах вэ гэдгээ дахин хуралдаж байж шийднэ.

 

-Үйлдвэр хөдөө, аж ахуйн салбарт шинэчлэлт өөрчлөлтийн олон ажил хийгдэж байгаа. Х.Баттулга сайд өөрийнхөө хүсэлтээр чөлөөлөгдөх хүсэлт өгсөн учраас Засгийн газар нухацтай хэлэлцэх байх. Шинэчлэлийг цааш нь үргэлжлүүлэх хүсэл эрмэлзлэл байна уу, үгүй юу гэдгийг Х.Баттулга сайдаас өөрөөс нь асуух хэрэгтэй.

 

-  Ардчилсан намын бүлэг Ерөнхийлөгчийн өргөн барьсан "давхар дээл"-ийг тайлах хуулийг дэмжих нь зүйтэй гэж үзэж байгаа. Харамсалтай нь эцсийн хэлэлцүүлэгт Ерөнхийлөгчийн өргөн барьсан хуулийн хувилбар 180 градус эргэсэн. Ерөнхийлөгч зөвхөн Ерөнхий сайд УИХ гишүүн байж болно гэснийг Ерөнхий сайд буюу үндсэн чиг үүргийн яамдууд гэж өөрчилсөн. Хоёрдугаарт, Ерөнхийлөгч энэ хуулийг 2016 оноос мөрдөнө гэж заасныг 2014 он болгож өөрчилсөн. Тийм учраас эцсийн хэлэлцүүлгийн үеэр Ардчилсан нам Ерөнхийлөгчийн өргөн барьсан анхны хувилбарыг дэмжинэ гэдэг дээр байр сууриа хатуу илэрхийлсэн. АН уг асуудлаар одоог хүртэл байр сууриа илэрхийлсээр байгаа. Үүгээр далимдуулан Засгийн газрыг тогтворгүй болгох гэсэн хөндлөнгийн өдөөлтөд АН ороогүй. Цаашид ч орох ёсгүй. АН хэзээ ч 100 хувийн саналаар асуудлыг шийдэж байгаагүй. Зарим гишүүд өөр, өөрийнхөө үзэл бодлоор саналаа өгснийг буруутгахгүй байгаа.

 

-Уг нь намын асуудал байгаа юм. Манай Хяналтын Ерөнхий хорооны шийдвэр бол дүгнэлт юм. Үүнийг шийддэг байгууллага бол Үндэсний зөвлөлдөх хороо. Бид хэн нэгэндээ ял тулгах гэж энэ Засгийг бариагүй, олонх болоогүй. Гэхдээ өөрсдийнхөө намын үндсэн зарчим шийдвэрийг хүндэтгэж үзэх нь тэдний хамгийн гол улс төрийн ноён нуруу байх ёстой гэдэг дээр хатуу байр суурьтай байгаа. Асуудал дандаа Ардчилсан намын шийдвэрээс гажаад явна гэж бодохгүй байна. Бидэнд дотроо ойлголцох зүйлүүд байгаа. Гэхдээ үүнийг эргэж нийлшгүй хагарал гэж ойлгож болохгүй.

 

-Х.Тэмүүжин сайдын асуудлаар Ардчилсан намын байр суурь хэвээрээ байгаа. Сүүлийн үед Х.Тэмүүжин сайдын хувийн амьдрал руу нь хэт их орж байна. Нотлогдоогүй зүйл олон байгаа. Хэн нэгнийг гэм буруутай нь нотлогдоогүй байхад хариуцлага хүлээлгэх ёсгүй. Хуулийн дагуу дөрөв дэх өдөр энэ асуудлыг хэлэлцэнэ.

 

-Сайд нарт хариуцлага тооцох тухай асуудлыг оруулж ирэх нь Засгийн газар буюу Ерөнхий сайдын хийх ажил.