Үндэсний телевиз
Цагийн хүрд
Найм арваннэг
УИХ-ын Өргөдлийн байнгын хороо өчигдөр үдээс хойш хуралдлаа. Хуралдаанаар Ашигт малтмалын газрын дарга асан Д.Батхуягийн буруутай үйл ажиллагаанаас ашигт малтмалын тусгай зөвшөөрөл нь хүчингүй болсон, тусгай зөвшөөрлийг сэргээхийг хүссэн иргэдийн өргөдлийг хэлэлцлээ.
Хууль зөрчиж олгосон гэж үзэн шүүхийн шийдвэрээр хүчингүй болсон ашигт малтмалын 106 тусгай зөвшөөрөлтэй холбоотой асуудлыг шийдвэрлэх зорилгоор байгуулагдсан ажлын хэсгийнхнээс байнгын хорооны гишүүд асуулт асуун, санал бодлоо солилцов.
Хэлэлцэж буй асуудалтай холбогдуулан УИХ-ын гишүүн Ж.Батзандан, Д.Сарангэрэл, С.Одонтуяа нар Төрийн буруутай үйл ажиллагаанаас болж аж ахуйн нэгж, иргэд хохирч болохгүй, төр хариуцлагаа хүлээх нь зүй ёсны хэрэг гэсэн байр суурьтай байгаагаа илэрхийллээ.
Энэ удаагийн хуралдаанд Уул уурхайн яамны дэд сайд О.Эрдэнэбулган, Ашигт малтмалын газрын Төрийн захиргаа удирдлагын газрын дарга Н.Алтанцог болон албаны хүмүүс, “Ашигт малтмалын тусгай зөвшөөрөл эзэмшигч, хохирогч компаниудын холбоо” ТББ-ын төлөөлөл оролцлоо.
Хуралдааны үеэр ашигт малтмалын хайгуул хийх тусгай зөвшөөрлөө хураалгасан хохирогчдын өмгөөлөгч, хуульч нар тусгай зөвшөөрлийнх нь асуудлыг шийдэж өгөхийг хүсч, тухайн аж ахуйн нэгжүүд үйл ажиллагаагаа явуулж чадахгүй байгаагаас болоод 400 гаруй хүн ажлаа хийж чадахгүй байгаа талаар дурдсан юм.
Хуралдааны төгсгөлд байнгын хорооны дарга Р.Бурмаа хуралдаанд оролцогчид болон албаны хүмүүсийн санал дүгнэлтийг харгалзан үзэж байгаад ирэх долоо хоногт ашигт малтмалын хайгуулын тусгай зөвшөөрөл олгох сонгон шалгаруулалттай холбоотой асуудлаар шийдвэрийн төсөл боловсруулж оруулж ирэхээ мэдэгдлээ.
| Ашигт малтмалын тусгай зөвшөөрөл нь хүчингүй болсон иргэдийн өргөдлийг хэлэлцлээ | ||
| Үзсэн: 801 | Mongolian National Broadcaster |
М.Золзаяа
Б.Цоожчулуунцэцэг
Р.Слава
Сэтгэгдэл бичих:
АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.