"Амгалан" дулааны цахилгаан станцыг барихын тулд БНХАУ-аас нийт 70 сая долларын зээл авч байгаа бөгөөд үүнийг буцааж долоон жилийн хугацаанд төлөх аж.

 

Хэлэлцүүлгийн үеэр УИХ-ын гишүүн Ц.Нямдорж энэ зээлээ буцааж ямар эх үүсвэрээс төлөх талаар асуусан юм. Тэрээр “Энэ станцыг Засгийн газраас бариулж байгаа. Тэгэхээр авсан зээлээ буцааж яаж төлөх талаар тодорхой мэдээлэл байхгүй байгаа бол тэр 70 сая төгрөгийг явж явж улсын төсвөөс л төлөх болно” гэж хэлсэн юм. Энэ талаар Төсвийн байнгын хорооны хариултыг сонсох хэрэгтэй гэсэн боловч байнгын хорооны дарга Ц.Даваасүрэн гадаад томилолттой тул хуралдаанд ирээгүй. Харин байнгын хорооны санал дүгнэлтийг танилцуулсан Л.Эрдэнэчимэг гишүүн уг асуултад хариулж чадахгүй гэж мэдэгдлээ.

 

Тиймээс Сангийн сайд Ч.Улаан уг асуултад хариулсан бөгөөд түүний тайлбарласнаар бол энэхүү станц барих ажил нь Эрчим хүчний яамнаас хэрэгжүүлж байгаа төсөл аж. Төсөл хэрэгжиж эхэлмэгцээ өөрийн үр дүнгээрээ зээлээ төлөх боломжтой гэж үзэж байгаа ажээ.

 

Түүнчлэн салбарын яамнаас нь хэрэгжүүлж буй төслийн талаар хэлэлцүүлгийг хийж байхад М.Сономпил сайд байсангүй.