“Төрийн мэдээлэл” эмхэтгэлийн шинэ дугаар гарлаа. Тус эмхэтгэлийн өнөөдрийн дугаарт, Монгол Улсын Засгийн газрын тухай хуульд нэмэлт оруулах тухай хууль буюу агаарын бохирдлын эсрэг үйл ажиллагаа хэрэгжүүлэх асуудлыг энэ хуульд нэмэлтээр оруулжээ.

Мөн дугаарт, Монгол Улсын нэгдсэн төсвийн 2014 оны төсвийн хүрээний мэдэгдэл, 2015-2016 оны төсвийн төсөөллийн тухай хуульд өөрчлөлт оруулах тухай хуулийг нийтлэв. Үүгээр төсвийн хүрээний мэдэгдэл, төсвийн төсөөллийн эдийн засгийн үзүүлэлтүүд түүний дотор дотоодын нийт бүтээгдэхүүний бодит өсөлтийн хэмжээ, хэрэглээний үнийн индексийн түвшин, нэгдсэн төсвийн тэнцвэржүүлсэн орлогын хэмжээ, нийт зарлагын дээд хэмжээ зэргийг баталсан байна.

Эмхэтгэлийн шинэ дугаарт Нийгмийн даатгалын сангийн 2014 оны төсвийн тухай хуульд өөрчлөлт оруулах тухай хууль, Монгол Улсын Засгийн газар, Азийн хөгжлийн банк хооронд байгуулсан “Хүнс, тэжээл, нийгмийн халамжийн төсөл:Нэмэлт санхүүжилт”-ийн зээлийн хэлэлцээр, “ Гэр хорооллыг хөгжүүлэх, хөрөнгө оруулалтыг дэмжих хөтөлбөр”-ийн санхүүжилтийн ерөнхий хэлэлцээр, Монгол Улсын Засгийн газар, Японы Олон улсын хамтын ажиллагааны байгууллага хооронд байгуулсан “Инженер, технологийн дээд боловсрол” төслийн зээлийн хэлэлцээр соёрхон батлах тухай хуулийг тус тус нийтэллээ.