Японы Ерөнхий сайд Кишида Фумио Украины эсрэг цэргийн хүчийг ашиглан одоогийн нөхцөл байдлыг өөрчлөхийг тэвчих нь Азид сөргөөр нөлөөлнө гэж анхаарууллаа.

Тэрбээр Украины нөхцөл байдал маш хүнд байгаа учир юу ч тохиож болзошгүй гэж пүрэв гарагт эрх баригч гол Либерал ардчилсан намын бүлгийнхээ хурал дээр мэдэгджээ. Тодруулбал, “Янз бүрийн улс орнууд дипломат хүчин чармайлтаар хямралыг зохицуулах оролдлогыг үргэлжлүүлж байна. Энэ асуудал Европт төвлөрч байгаа ч хэрэв цэргийн хүчээр дамжуулан одоогийн нөхцөл байдлыг өөрчлөхийг зөвшөөрвөл энэ нь Ази тивд сөрөг үр дагавар авчрах болно” гэж мэдэгдсэн байна.

Мөн тэрбээр Японы Засгийн газар дипломат арга замаар хурцадмал байдлыг намжаахын тулд хүчин чармайлт гаргана гэж нэмж хэлэв. Японы Ерөнхий сайд Кишида Фумио пүрэв гарагийн орой ОХУ-ын Ерөнхийлөгч Владимир Путинтэй утсаар ярьж, одоогийн нөхцөл байдалтай холбоотой байр сууриа илэрхийлсэн байна.

Японы Ерөнхий сайд Кишида Фумио "Би Ерөнхийлөгч Путинд Украины нөхцөл байдлыг анхааралтай ажиглаж байна гэж хэлсэн. Би түүнийг хүчирхийллээр бий болгосон одоогийн нөхцөл байдлыг өөрчлөх бус, дипломат хэлэлцээгээр холбогдох улс орнуудад хүлээн зөвшөөрөгдөхүйц шийдэлд хүрэхийг уриалсан" гэжээ.

Япон улс хурцадмал байдлыг намжаахын тулд дипломат хүчин чармайлтаа үргэлжлүүлж, Их долоогийн бусад орон болон олон улсын хамтын нийгэмлэгтэй хамтран ажиллах болно гэдгээ мэдэгдсэн байна.