Гишүүд энэ үеэр малын хулгайтай тэмцэх, шинэ төрлийн гэмт хэрэг болох хүн худалдаалах, цахим гэмт хэрэг, хар тамхины худалдаатай тэмцэх ажилд ямар ахиц гарсныг тодруулж байсан юм. Тухайлбал, Хууль зүйн сайд Х.Тэмүүжин, хар тамхины худалдаа, цахим болон хүн худалдаалах гэмт хэрэгтэй тэмцэхийн тулд чадавхиа сайжруулах шаардлагатай байлаа гээд өнгөрсөн онд ажилтнуудаа мэргэшүүлэн бэлтгэх, техник, технологио сайжруулах, гадаад харилцаагаа өргөжүүлэх тал дээр анхааран ажиллалаа гэсэн юм.

 

Түүнчлэн 2013 онд туршлага судлах хүрээнд чиглэлийн байцаагчдыг Хонгконг, Тайвань, АНУ-д сургаж, олон улсын байгууллагын мэргэжилтнүүдийг хоёр удаа урьж сургалт явуулснаас гадна Холбооны мөрдөх товчоотой хамтран хар тамхи, цахим болон хүн худалдаалах гэмт хэрэгтэй тэмцэх чиглэлээр хамтарсан сургалт зохион байгуулсан талаар хэллээ.

 

Байнгын хорооны гишүүд гэрч, хохирогчийг хамгаалах гэх зэрэг олон ажилд дэвшил гарсан гэж үнэлж байлаа. Гэхдээ тоонд бус чанарт анхаарч, сүүлийн үед нийгмийг цочроож байгаа гэмт хэргийн гаралт нэмэгдээд байгаад анхаарч ажиллахыг санууллаа.  Гишүүд ийнхүү хэлэлцээд санал, дүгнэлтээ Төрийн байгуулалтын байнгын хороонд хүргүүлэхээр тогтлоо.