Хэлэлцүүлгийн үеэр Төрийн байгуулалтын байнгын хорооны дарга А.Бакей ирэх намрын чуулганаар хэлэлцэх хууль, тогтоомжийн төслүүдийг танилцуулсны дараа гишүүд асуулт асууж саналаа хэлсэн юм. Ингэхдээ гишүүд өөрийн санаачилсан болон бүлгийн санаачилсан хуулийн төслийг хэлэлцэх асуудлын жагсаалтад оруулаагүй байгаа талаар асууж байлаа.

 

Тухайлбал, УИХ-ын гишүүн Л.Эрдэнэчимэг өөрийнх нь санаачилсан Архины хяналтын тухай хуулийн төслийг хүлээж авахаас удаа дараа татгалзсан талаар хэлээд УИХ-ын даргыг уг хуулийн төслийг хэзээ хүлээж авах вэ гэдгийг асуусан. Харин УИХ-ын дарга хурлын Дэгийн тухай хуулийн дагуу би энэ асуултад хариулах шаардлагагүй гэсэн тайлбарыг хийсэн юм.

 

УИХ-ын гишүүн Д.Батцогт “УИХ-ын Нийгмийн бодлого, боловсрол, соёл, шинжлэх ухааны байнгын хорооноос нийт арван төслийг намрын чуулганаар хэлэлцүүлэхээр санал өгсөн ч ердөө хоёрыг оруулсан байна. Мөн хаврын чуулганы хугацаанд багтаагаад Эмийн талаар төрөөс баримтлах бодлогыг батлах боломжтой байсан, эцсийн хэлэлцүүлгийг хийхээр байнгын хороо санал дүгнэлтээ боловсруулчихсан байтал УИХ дахь гурван намын бүлгийн даргын тааллаар хэлэлцэх асуудлын дарааллаас хассан байх юм. УИХ, Байнгын хороогоор хэлэлцэх асуудлыг гурван намын бүлгийн дарга шийддэг юм бол УИХ-ын 76 гишүүн байхын хэрэг байна уу. Төрөөс эмийн талаар баримтлах бодлогын эцсийн хэлэлцүүлгийг хийхэд тавхан минут л хангалттай. Үүнд Байнгын хорооны даргаас хариулт хүсч байна” гэв.

 

Гишүүний уг асуултад Төрийн байгуулалтын байнгын хорооны дарга А.Бакей “Эмийн талаар төрөөс баримтлах бодлогыг намрын чуулганаар “Бусад” гэдэг асуудлын хүрээнд оруулж батлах боломжтой. Намрын чуулганаар хэлэлцэх асуудлын тухайд Нийгмийн бодлого, боловсрол, соёл, шинжлэх ухааны байнгын хорооноос долоон хуулийн төслийн жагсаалт ирснээс хоёрыг нь намрын чуулганаар хэлэлцэх асуудалд багтаасан. Үлдсэн таван төслөөс гурав нь өргөн мэдүүлээгүй төсөл байсан” гэж хариуллаа.

 

Мөн УИХ-ын гишүүн З.Баянсэлэнгэ ч мөн “Шударга ёс” эвслийн бүлгийн гишүүдийн өргөн барьсан “Өршөөлийн тухай” хууль болон өөрийнх нь өргөн мэдүүлсэн хуулийн төслүүдийг хэлэлцэхгүй байгаа талаар хэлсэн юм.

 

Ингээд ирэх намрын чуулганаар хэлэлцэх асуудалтай холбогдуулж УИХ-ын гишүүд асуулт асууж саналаа хэлж дууссаны дараа УИХ-ын 2014 оны намрын ээлжит чуулганаар хэлэлцэх асуудлын тухай УИХ-ын тогтоолын төслийг батлах талаар санал хураахад гишүүдийн олонх дэмжсэн тул хуулийн төсөл батлагдлаа.