УИХ-ын хүндэтгэлийн хуралдаан болно

Шуурхай:

УИХ-ын хүндэтгэлийн хуралдаан болно

2014-08-14 16:55:26

УИХ-ын Тамгын газрын Ерөнхий нарийн бичгийн дарга Б.Болдбаатар өнөөдөр Монгол Улсын Ерөнхийлөгч Ц.Элбэгдоржийн урилгаар БНХАУ-ын дарга Си Жин Пин манай улсад айлчлах гэж буйтай холбогдуулан УИХ-ын хүндэтгэлийн хуралдааныг наймдугаар сарын 22-нд хийхээр товлосон болохыг албан ёсоор мэдэгдэв.

"УИХ-ын хүндэтгэлийн хуралдааны тов болоод ээлжит бус чуулган хуралдуулах эсэхийг УИХ-ын даргын дээд зөвлөл хэлэлцэн шийднэ хэмээн УИХ-ын Тамгын газрын Ерөнхий нарийн бичгийн дарга Б.Болдбаатар мэдээлэв" гэсэн агуулгатай мэдээ зарим сонин хэвлэл, сайтаар цацагдсан нь худал ташаа мэдээлэл болохыг онцлоод ээлжит бус чуулган хуралдах эсэхийг УИХ-ын даргын дээд зөвлөл хэлэлцдэггүй хэмээн тэрбээр тайлбарласан юм.

Түүнчлэн УИХ-ын Тамгын газрын Ерөнхий нарийн бичгийн дарга Б.Болдбаатар “Цахим парламент” төслийн хүрээнд хийгдэж буй техник технологийн шинэчлэлтийн ажлын талаар сэтгүүлчдэд мэдээллээ. Техник технологийн шинэчлэлийн ажлыг УИХ-ын Тамгын газар, Төрийн тусгай хамгаалалтын газрын холбогдох мэргэжилтнүүд, БНСУ-ын КТНет компани болон манай улсын программ хангамжийн чиглэлээр үйл ажиллагаа явуулдаг “Мизорн” ХХК-ийн мэдээллийн технологийн мэргэжилтнүүд хамтран гүйцэтгэж, төрийн холбогдох байгууллагууд хяналт тавин ажиллаж байгаа гэв.

Мөн 2012 онд УИХ-ын Тамгын газар, Эдийн засгийн хөгжлийн яам, БНСУ-ын Олон улсын хамтын ажиллагааны байгууллага /КОИКА/-ын хооронд байгуулсан хэлэлцээрийн протоколын дагуу БНСУ-ын Засгийн газрын 3.5 сая ам.долларын буцалтгүй тусламжаар 2013-2015 онд хэрэгжүүлэх “Цахим парламент” төслийг УИХ хэрэгжүүлж байна. Төслийн хүрээнд УИХ-ын чуулганы нэгдсэн хуралдаан болон Байнгын хороодын хуралдааны танхимуудын санал хураалт, микрофоны системийг шинэчлэх, LED дэлгэцээр тоноглох, УИХ-ын чуулганы нэгдсэн хуралдаан болон Байнгын хороодын хуралдааны танхимуудын дүрс бичлэгийн төхөөрөмжүүдийг шинэчлэх, Парламентын сэтгүүлчдийн өрөөг шинэчлэх, шаардлагатай техник хэрэгслээр тоноглох ажлууд хийгдэж байгаа талаар танилцууллаа.

Нийтэлсэн: О.Энхмаа

	УИХ-ын хүндэтгэлийн хуралдаан болно
Үзсэн: 1304	Mongolian National Broadcaster

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.