Хүүхдийн эрхийн конвенцийг хэрэгжүүлэх Тунхаг бичгийг баталжээ

Шуурхай:

Хүүхдийн эрхийн конвенцийг хэрэгжүүлэх Тунхаг бичгийг баталжээ

2014-08-25 10:09:44

Азийн Хүүхдийн эрхийн гуравдугаар Чуулга уулзалтыг Монгол Улсын Хүний эрхийн Үндэсний Комисс, Засгийн газрын хэрэгжүүлэгч агентлаг Хүүхдийн төлөө Үндэсний газар, НҮБ-ын Хүүхдийн сангийн Монгол дахь Суурин төлөөлөгчийн газар, Япон Улсын Хүүхдийн эрхийн Конвенцийн Институц хамтран Улаанбаатар хотноо наймдугаар сарын 23-24-ний өдрүүдэд зохион байгуулжээ. Чуулга уулзалтад Япон, Солонгос, Энэтхэг, Камбож, Индионези, Монгол зэрэг зургаан орны төлөөлөл хүүхдийн эрхийн асуудлаар хоёр өдөр амжилттай хэлэлцсэн байна.

НҮБ-ын Хүүхдийн Эрхийн тухай конвенцийн хэрэгжилтийг хангах, Азийн улс орнууд үндэсний болон орон нутгийн түвшинд хүүхдийн эрхийг хамгаалах талаар гаргаж буй хүчин чармайлт, ололт амжилт, туршлагаа харилцан солилцох, тулгамдаж буй бэрхшээл, цаашдын чиг хандлага, хамтын ажиллагаа эрэлхийлэх зорилготой тус чуулга уулзалтад Зүүн Азийн орнуудаас 40 гаруй төлөөлөгч хүрэлцэн ирж, нийт 160 гаруй хүн оролцжээ.

Тус чуулганд Хүүхдийн төлөө үндэсний газрын дарга И.Нарантуяа Монгол улсад НҮБ-ын Хүүхдийн Эрхийн Конвенцийн хэрэгжилтийн нөхцөл байдал, Засгийн газраас авч хэрэгжүүлж буй арга хэмжээний талаар илтгэл тавьж, энэхүү асуудлаар Зүүн Азийн орнуудыг хамтран ажиллахыг уриаллаа. Мөн Хүүхдийн төлөө үндэсний газрын Хүүхэд хамгаалал, үйлчилгээний газрын дарга Б.Жавзанхүү “Монгол улс дахь хүүхэд хамгаалал, хүүхдийн эрхийг хөхиүлэн дэмжих” илтгэлийг тавьсан байна.

Чуулганы төгсгөлд оролцогч зургаан орны төлөөлөл зөвшилцөж Хүүхдийн эрхийн асуудлаарх цаашид авч хэрэгжүүлэх арга хэмжээ, Хүүхдийн Эрхийн Конвенцийг хэрэгжүүлэхэд улс орнуудын хамтын ажиллагааг бэхжүүлэх үүднээс Тунхаг бичгийг баталжээ.

Нийтэлсэн: О.Энхмаа

	Хүүхдийн эрхийн конвенцийг хэрэгжүүлэх Тунхаг бичгийг баталжээ
Үзсэн: 1246	Mongolian National Broadcaster

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.