ОУВС энэ 2024 онд Хятадын эдийн засгийг 4,6 хувийн өсөлт үзүүлнэ гэдэг төлөв таамгийг оны эхэнд танилцуулж байсан. Тэгвэл энэ төлөвөө сая, таван хувьд хүрч өснө гэж ахиулж зарлалаа. Ингэх болсон шалтгаанаа ОУВС, энэ оны эхнээс Хятадын эдийн засагт хүчтэй өсөлтүүд гарч, бас засгийн газраас нь хэрэгжүүлж байгаа сүүлийн үеийн бодлогын арга хэмжээнүүдтэй холбон тайлбарласан байна.

Өнөөдөр нийтлүүлсэн хэвлэлийн мэдээнээс нь үзвэл ОУВС хятадын эдийн засаг өсөж байгаа одоогийн эрчим хэвээр үргэлжилнэ гэдэг тооцооллын үүднээс ирэх оны ДНБ-ий өсөлтийн төлөвийг нь мөн 4,1 хувь байснаас 4,5 хувь руу дээшлүүлсэн байна. Хятад улс өөрөө энэ онд эдийн засагтаа 5 орчим хувийн өсөлт үзүүлнэ гэж төлөвлөсөн байгаа. Оны эхний улиралд гэхэд тус улс, хэдийгээр орон сууцны зах зээл нь уналтад орсон байдал урт сунжирч дотоодын эрэлтэд нь дарамт учирч байгаа боловч тооцоолсноос өндөр буюу 5,3 хувийн өсөлт үзүүлсэн. Гэхдээ 2029 оноос Хятадын хүн амын хөгшрөлт өндөрсөж, бүтээмжийн өсөлт удааширснаар эз-йн өсөлт нь 3,3 хувь руу буурна гэж таамагласан байна. Энэ нь дунд хугацаандаа 3,5 хувиар өснө гэж таамаглаж байсан өмнөх төсөөллөө ОУВС бууруулсан дүн болж байна. Хоёр долоо хоног орчмын өмнө Хятадын эрх баригчид ипотекийн зээлийн хүүгийн доод хязгаарыг арилгах зэргээр үл хөдлөхийн салбарыг дэмжих далайцтай арга хэмжээ авахаа зарласан. ОУВС-ын дэд тэргүүн Гита Гопинат энэ мэт бодлогын алхмуудыг сайшаасны зэрэгцээ илүү өргөн хүрээтэй арга хэмжээ шаардлагатай.

Мөн Хятадын макро эдийн засгийн богино хугацааны бодлого дотоодын эрэлтээ дэмжих, сөрөг эрсдэлийг зөөллөхөд чиглэх ёстой гэж ОУВС-ын дэд тэргүүн үзсэнийг дээрх мэдээлэлд мөн дурдсан байна. Үүний зэрэгцээ Хятадын дарга Ши Жиньпин даваа гарагт хийсэн мэдэгдэлдээ, “өндөр чанартай, мөн хангалттай ажил эрхлэлтийг” дэмжих шаардлагыг онцлон тэмдэглэжээ. Ялангуяа их дээд сургууль, коллеж төгсөгчид болон бусад залуу хүмүүсийн ажил эрхлэлтийг дэмжих бодлогоо сайжруулахыг Ши Жиньпин онцлон мэдэгдсэнийг Синхуа уламжилсан байна.