Тэрээр Улс төрийн хилс хэрэгт хэлмэгдэгсдийн дурсгалыг хүндэтгэх өдрийг тохиолдуулан өнөөдөр хийсэн хэвлэлийн бага хурлын үеэр ийнхүү мэдэгдээд, “Улс төрийн хилс хэрэгт хэлмэгдэгчдийг цагаатгах, тэдэнд нөхөх олговор олгох тухай” хуулийн зарим заалтын үйлчлэлийн хугацааг сунгах, хэлмэгдэгсдийн нийгмийн асуудалд анхаарах энэ хүрээнд нөхөх олговрын хэмжээг нэмэгдүүлэх саналын төслөө УИХ-д өргөн бариад байгаагаа онцлон тэмдэглэв.

 

УИХ-аас 1998 онд баталсан “Улс төрийн хилс хэрэгт хэлмэгдэгчдийг цагаатгах, тэдэнд нөхөх олговор олгох тухай” хууль хэрэгжиж эхэлснээс хойш өнөөг хүртэл хэлмэгдэгсэд, тэдний төрөл төрөгсөд болох 18036 хүнд 16 тэрбум 247.4 сая төгрөгийн нөхөх олговрыг төрөөс олгоод байна. Энэ оны эхний найман сард 34 иргэн 33 сая төгрөгийн нөхөх олговрыг авчээ.

 

19 дэх удаагаа тэмдэглэж буй Улс төрийн хилс хэрэгт хэлмэгдэгчдийн дурсгалын өдөр буюу энэ сарын 10-нд хэлмэгдэгчдийн дурсгалыг хүндэтгэх олон арга хэмжээ зохион байгуулахаар төлөвлөсний дотор Монгол Улсын төр, засгийн тэргүүн нар, төр захиргаа, олон нийтийн байгууллагууд, хэлмэгдэгсэд тэдний төрөл төрөгсөд Хэлмэгдэгсдийн төв хөшөө болон Сонгинохайрхан уулын бэл дэх хэлмэгдэгсдийн хөшөөнд тус тус цэцэг өргөж хүндэтгэл үзүүлэх, “1932 оны бослого” сэдэвт эрдэм шинжилгээний бага хурал хийх, сүм хийдэд буяны ном хуруулах, хэлмэгдэгсэдтэй уулзалт хийх, хэлмэгдүүлэлтийн хор уршгийн талаар хичээл заах зэрэг арга хэмжээ зохион байгуулах гэж байгаа талаар Комиссын нарийн бичгийн дарга Д.Дамбасүрэн сэтгүүлчдэд мэдээллээ.

 

Өнөөдөр Хэвлэлийн бага хурал хийхийн өмнө УИХ-ын дэд дарга, Цагаатгах ажлыг удирдан зохион байгуулах Улсын комиссын дарга Логийн Цог хэлмэгдэгсдийн төлөөллийг хүлээн авч уулзах үеэр нийт 20 хэлмэгдэгч, тэдний үр хүүхдэд гэр олгох тухай батламж гардууллаа.