Жендэрт суурилсан хүчирхийлэлтэй тэмцэх 16 хоногийн аян эхэлжээ. Энэхүү аяныг  Монгол Улсын Засгийн газар, Жендэрийн үндэсний хороо, НҮБ- ын Хүн амын сангийн дэмжлэгтэйгээр зохион байгуулж байна. Энэ удаагийн аяныг "Охид эмэгтэйчүүд хаана ч аюулгүй - Шалтаг бүү тооч" уриан дор үндэсний хэмжээнд хийж байгаа аж. Жендэрт суурилсан хүчирхийллийн эсрэг 16 хоногийн аяныг олон улсад жил бүрийн арваннэгдүгээр сарын 25-наас арванхоёрдугаар сарын 10-ны хооронд тэмдэглэдэг. Харин манай  улс 1997 оноос эхлэн Хүчирхийллийн эсрэг үндэсний төвөөс анх энэ аяныг зохион байгуулсан түүхтэй юм байна.  

Өнөөдөр "Дижитал эрин зуунд технологи ашиглан үйлдэгдэж буй жендэрт суурилсан хүчирхийлэлтэй тэмцэх нь" хэлэлцүүлэг болсон.  Уг хэлэлцүүлэгт Хүний эрхийн үндэсний комиссын гишүүн Х.Мөнхзул, Азийн сангийн судлаач Л.Ариунзул, НҮБ-ын Залуучуудын зөвлөх хорооны гишүүн Т.Андир, Канад болон Их Британийн Монгол Улсад суугаа Элчин сайд нар оролцжээ. Жендэрт суурилсан хүчирхийллийг тандах судалгааг 7-10 жилд нэг удаа шинэчилдэг. Манай улсад өмнө нь төрийн оролцоо, дэмжлэгээр эхний тандалтыг 2017 онд зохион байгуулж байсан байна. Тэгвэл Монгол Улс дахь эмэгтэйчүүдийн эсрэг хүчирхийллийн тархалтыг судлах үндэсний хэмжээний хоёр дахь судалгааг хийхэд технологи ашиглан үйлдэгдэж буй жендэрт суурилсан хүчирхийллийг илүү тодорхойлох шаардлагатай байгааг зохион байгуулагчид онцолсон юм.