Шууд Chart

Дэлхийн хөшөө дурсгалын сан 2025 хөтөлбөрт “Эрдэнэзуу” хийд шалгарчээ

2025-01-22 17:50:45

Дэлхийн Хөшөө Дурсгалын Сан (WMF) хөтөлбөрийн анхаарах ёстой 25 түүхэн, дурсгалт газруудын нэгээр “Эрдэнэ Зуу” хийд шалгарлаа. Монголын Буддын шашны цөөхөн дурсгалт газруудын нэг “Эрдэнэзуу” хийдийг уур амьсгалын нөлөөллөөс хадгалан хамгаалах, ирээдүйн өвийн мэргэжилтнүүдийг бэлтгэх зорилготойгоор уг төсөлд нэр дэвшүүлсэн юм.

Энэхүү сан 1996 оноос эхлэн, хүн төрөлхтний түүхийг илэрхийлэх, үнэт дурсгал, дурсгалт газруудыг хамгаалах зорилготойгоор 2 жил тутамд зарладаг World Monuments Watch хөтөлбөрийг олон улсын мэргэжилтнүүдийн хамтаар хэрэгжүүлдэг билээ.

Дэлхийн 112 оронд 700 гаруй төсөл хэрэгжүүлсэн, өвийг хамгаалах чиглэлээр үйл ажиллагаа явуулж буй дэлхийд тэргүүлэгч Дэлхийн хөшөө дурсгалын сан (WMF) нь өнөөдрийг хүртэл 350 орчим Watch хөтөлбөрт шалгарсан төслүүдэд 120 сая гаруй долларыг хандивлаж, бусад эх үүсвэрээс нэмэлт 300 сая долларын хөрөнгө оруулалтыг хийсэн байна.

 


Дэлхийн Хөшөө Дурсгалын Сан (WMF) нь Watch хөтөлбөрт шалгарсан эдгээр 25 газрыг дэлхий даяар танилцуулж, тэдний хадгалалтад орон нутгийн болон олон улсын дэмжлэгийг татан оролцуулахыг зорьж байна. Ирэх хоёр жилийн хугацаанд WMF-ийн олон улсын баг 2025 оны шалгарсан газруудтай хамтран ажиллаж, тухайн орон нутгийн хэрэгцээг үнэлж, дэмжлэг, хадгалалт, хамгаалалт, санхүүжилтийн стратегийг хамтран боловсруулна. Санхүүжилт босгохын хэрээр WMF нь орон нутгийн түншүүддээ зорилтот урамшууллын кампанит ажил, төлөвлөлт, судалгаа, боловсрол, биет хамгаалалтын төсөл боловсруулахад дэмжлэг үзүүлэх юм .

Монголын Урлагийн Зөвлөл (МУЗ) нь 2019 оноос Дэлхийн Хөшөө Дурсгалын Сан (WMF)-тай хамтран ажиллаж, 2020 оны World Monuments Watch хөтөлбөрт Чойжин ламын сүм музейг амжилттай нэр дэвшүүлэн, тус музейг олон улсын анхаарлын төвд авчран, сэргээн засварлалтын талаарх техникийн туслалцаа үзүүлж, олон улсын хамтын ажиллагааг 3 жилийн турш хэрэгжүүлсэн билээ.

Дэлгэрэнгүй эндээс үзнэ үү?

 

Нийтэлсэн: Н.Алтанцэцэг

Дэлхийн хөшөө дурсгалын сан 2025 хөтөлбөрт “Эрдэнэзуу” хийд шалгарчээ  
Үзсэн: 605 Mongolian National Broadcaster  

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.
1000 Сэтгэгдэлээ бичнэ үү

Бидэнтэй нэгдээрэй