Монголын улаан загалмай нийгэмлэг нь Япон улсын Улаан загалмай нийгэмлэгтэй хамтран хоёр орны улаан загалмайчдын гишүүн солилцооны хөтөлбөрийг жил бүр зохион байгуулж ирсэн уламжлалтай.

Энэ жилийн хувьд улаан загалмайчдын гишүүн солилцооны хөтөлбөрийг Япон улсад зохион байгуулахаар боллоо.

Тус хөтөлбөр нь 2025 оны долоодугаар сарын 2-8-ны өдрүүдэд Япон улсын Айчи, Гифү мужид зохион байгуулагдах бөгөөд Монголын улаан загалмай нийгэмлэгийн Хүүхэд залуучуудын хөдөлгөөний 14-17 насны нийт 7 гишүүнийг сонгон шалгаруулж, хөтөлбөрт хамруулах юм.

Аймаг, нийслэлийн Улаан загалмайн Дунд шатны хороо тус бүрээс хоёр хүртэлх гишүүний анкетыг хоёрдугаар сарын 21-ний дотор хүлээн авах бөгөөд МУЗН-ийн Хүүхэд залуучуудын хөдөлгөөнийг дэмжих багт ирүүлнэ.

Оролцогч нь Хүүхэд залуучуудын хөдөлгөөний гишүүнээр хоёр жилээс дээш хугацаанд идэвхитэй ажилласан, сайн дурын, хүмүүнлэгийн үйл ажиллагаанд 10-аас доошгүй удаа хамрагдсан, удирдан зохион байгуулах туршлагатай, англи, япон хэлний чадвартай байх шалгуурыг тавьж байна гэж Монголын улаан загалмай нийгэмлэгээс мэдээллээ.