Боловсролын сайдын 2024 оны  долдугаар сарын 19-ний өдрийн “Хичээлийн жилийн бүтэц шинэчлэн батлах тухай” А/01 дүгээр тушаалаар аймаг, сум, багийн болон нийслэлийн ерөнхий боловсролын сургуулийн хичээлийн жилийн бүтцийг баталсан бөгөөд 2024-2025 оны хичээлийн жилд I, II улиралд бие даалтын 7 хоногийг зохион байгуулахаар тусгасан.

Хоёрдугаар  улирлын бие даалтын долоон хоног нийслэлд гуравдугаар сарын 31-ний өдрөөс  дөрөвдүгээр сарын 4-ний өдрийг дуустал. Харин орон нутагт гуравдугаар сарын 24-ний өдрөөс гуравдугаар сарын 28-ны өдрийг дуустал аж.

Бие даалтын долоон  хоногийг зохион байгуулахад аймаг, нийслэлийн Боловсролын газар, ЕБС-ийн удирдах ажилтан, багш нар дараах байдлаар хамтран ажиллана.

Аймаг, нийслэлийн түвшинд

• Өөрийн орон нутаг, дүүргийн Онцгой байдлын газар, хэлтэстэй хамтран ажиллах төлөвлөгөө гарган хэрэгжүүлэх
• “Аюулгүй амьдрах ухаан” хөтөлбөрийн хэрэгжилтэд дэмжлэг үзүүлэх хүрээнд уялдаатай төлөвлөгөө гаргах
• Сургуулиудаа мэргэжил, арга зүйн удирдлага, зохион байгуулалтаар хангах

Сургуулийн түвшинд

• Онцгой байдлын газар, хэлтэс, аврах ангитай хамтран ажиллах, сургуулийн түвшинд хэрэгжүүлэх
• Төлөвлөгөө гаргаж удирдлага, зохион байгуулалтаар хангах
• “Аюулгүй амьдрах ухаан” хөтөлбөрийн хэрэгжилтийг дэмжих чиглэлээр өөрийн сургуулийн орчин нөхцөл, онцлогт тохирсон үйл ажиллагаа төлөвлөн зохион байгуулах

Багш нарын түвшинд

• Сургуулиас гаргасан төлөвлөгөөний дагуу суралцагчдын нас, бие, сэтгэхүйн онцлог, хэрэгцээнд нийцсэн үйл ажиллагаа зохион байгуулахад хамтран ажиллах
• Өөрийн удирдсан ангийн эцэг эх, асран хамгаалагч, харгалзан дэмжигчидтэй хамтран ажиллах
• Үйл ажиллагааг зохион байгуулахдаа дараах зүйлсийг анхаараарай
• “Аюулгүй амьдрах ухаан” сургалтын хөтөлбөрийг дэмжих
• Суралцагчдын нас, хүйс, сэтгэхүйн онцлогт тохируулах
• Суралцагчдын ялгаатай байдалд хүндэтгэлтэй хандах
• Малчин өрхийн суралцагчдад тохирсон уян хатан байх
• Төлбөр, хураамж, хандив хураахгүй байх
• Олон төрлийн үйл ажиллагаа төлөвлөж хэт их ачаалал үүсгэхгүй байх