УИХ-ын гишүүн М.Батчимэг уулзалтын эхэнд хэлсэн үгэндээ хилийн чинадад суугаа Өргөмжит консулуудын зөвлөлдөх уулзалтыг хоёр жил тутамд зохион байгуулж байгааг онцлоод УИХ-ын хууль тогтоох үйл ажиллагаа, Байнгын хорооноос хэрэгжүүлж буй арга хэмжээ болон шинээр баталсан хууль тогтоомжуудын талаар товч танилцууллаа. Монгол Улсын иргэд ажиллаж, сурах зорилгоор хилийн чанадад олноор зорчих болсон, түүнчлэн гадаадын аж ахуйн нэгжүүд манай улсад бизнес эрхлэх сонирхол нэмэгдсэн зэрэг нь Монгол Улсыг хилийн чанадад төлөөлөн ажиллаж байгаа Өргөмжит консулуудын үүрэг, хариуцлагыг улам өндөрсгөж байгааг тэрбээр онцлоод монгол иргэдийн эрх ашгийг хамгаалах, тэдэнд бүх талын дэмжлэг туслалцаа үзүүлэхэд анхаарч ажиллаж буйд нь талархал илэрхийллээ. Дараа нь тэрээр уулзалтад оролцсон зарим Өргөмжит консулын сонирхсон асуултад хариулт өгч, санал бодлоо хуваалцсан юм.

 

Өргөмжит консулуудын уулзалтыг хоёр жил тутамд зохион байгуулж дараагийн хоёр жилийн үйл ажиллагааны үндсэн чиглэл, Засгийн газрын үйл ажиллагааны хөтөлбөрийг хэрэгжүүлэхтэй холбоотой тодорхой асуудал зэргийг хэлэлцдэгээс гадна Гадаад харилцааны яамнаас тэдэнд ажил төрлийн зааварчилгаа өгч, шинээр гарсан хууль журмын талаар танилцуулдаг уламжлалтай. Одоогоор дэлхийн 44 орны 72 иргэн хилийн чинадад Монгол Улсыг төлөөлөн Өргөмжит консулаар ажилладаг ажээ.