АНУ-ын төрийн департмент Израйль, Палестиний төлөөлөгчид оролцож байгаа энхийн хэлэлцээ Вашингтонд эхэллээ. Тус хэлэлцээ 2 хоног үргэлжилнэ. 3 жилийн дараа анх удаа эхэлж байгаа энэ хэлэлцээнд АНУ зуучлагч үүрэг гүйцэтгэж байгаа бөгөөд тус бүс нутаг төдийгүй дэлхийн энх тайван, тогвтортой байдалд өөрсдийн үүргийг гүйцэтгэж байгаагийн илрэл гэж үзэж байгаа юм. Энэ тухай АНУ-ын Ерөнхийлөгч Барак Обама сэтгүүлчдэд мэдэгдэхдээ “Энэ хэлэлцээг үр дүнд хүрнэ гэж найдаж байна. Энх тайван, аюулгүй байдлыг авчрахын төлөө АНУ энэ хэлэлцээг дэмжин ажиллах болно ” гэсэн байна. Мөн энэхүү хэлэлцээг эхлэхийг 2 талд уриалсан АНУ-ын төрийн нарийн бичгийн дарга Жон Керри “Хэлэлцээнд оролцогч 2 талын төлөөлөгчид зарим хүнд хэцүү асуудлууд дээр ухаалаг, хүлээцтэй байр сууринаас хандаж, хэлэлцээг амжилтанд хүргэнэ” гэж итгэж байгаагаа илэрхийлсэн байна. Ийнхүү энхийн хэлэлцээний ширээний ард суух хүртлээ хурцадсан Израйль, Палестины хоорондын маргаан Израйлийн тал 2 улсын хилийн зурваст Еврейн суурин барьснаас үүдэлтэй, олон асуудлуудаас болж бий болсон юм. Гэхдээ, тус 2 улс энэ маргаанаа зогсоож, энх тайвныг эрэлхийлж байгаагаа илэрхийлж Израйлийн тал Палестиний хоригдлуудыг суллах болсноо мэдэгдсэн юм. Ийм нөхцөл байдалд энхийн хэлэлцээний үр дүнгээс хамаарч Ойрхи Дорнод тэр дундаа олон жил үргэлжилсэн Израйль, Палестиний мөргөлдөөн цааш хэрхэн үргэлжлэх вэ гэдэг нь шийдэгдэх юм.