Уур амьсгалын асуудлаархи Ерөнхийлөгчийн зарлигийг хүлээлгэн өгөх ёслолын ажиллагаа БОНХЯ-ны Хаан танхимд боллоо. Зарлигийг Ерөнхийлөгчийн Тамгын газрын дарга Д.Цагаан, БОНХ-ийн Сайд С.Оюунд гардуулан өглөө.

 

Монгол Улсын тогтвортой, ногоон хөгжлийн бодлогыг улс орны болон нийгэм эдийн засгийн салбарууд орон нутгийн хөгжлийн бодлого стратегитэй уялдуулан хэрэгжүүлэх ёстойг Ерөнхийлөгч зарлигтаа тусгасан байна. Мөн ард иргэд, олон нийт, аж ахуйн нэгж байгууллагуудын уур амьсгалын өөрчлөлтөд өртөх байдлыг бууруулах, уур амьсгалдаа зохицсон аж ахуйн үйл ажиллагаа эрхэлж, амьдралын дадал зуршил хэвшлээ өөрчлөхөд нь дэмжлэг үзүүлж, тэднийг шаардлагатай мэдээлэл чиглэлээр хангах тухай заасан байна.

 

Түүнчлэн агаарт ялгаруулж байгаа хүлэмжийн хийн хэмжээгээ багасгахын тулд үйлдвэрлэлийн техник технологио шинэчлэх, байгальд ээлтэй технологи нэвтрүүлэх, сэргээгдэх эрчим хүчийг өргөн хэрэглэх, цахилгаан дулааны алдагдлыг багасгах, үйлдвэрлэл хэрэглээний үр ашгийг дээшлүүлэх талаар тодорхой арга хэмжээ авахыг чиглэл болгожээ.