Ойн тооллогын судалгаанд хамрагдах газрыг ой ургамалжилтын муж болон ойн тархалтын онцлогийг харгалзан Монгол-Алтайн уулс, Хөвсгөл, Хангай-Хэнтийн бүс, Төв-Хангайн бүс гэсэн ангиллаар нийтдээ 4211 цэгт тоолж байгаа юм. Энэхүү ажилд мэргэжлийн эрх бүхий 10 аж ахуйн нэгжийн 22 баг , хяналтын давтан тооллогын гурван баг гүйцэтгэгчээр ажиллаж байгаа бөгөөд ажлын гүйцэтгэл 90 орчим хувьтай байна.

 

Энэ төслийг хэрэгжүүлэхэд улсын төсөвт 1.0 тэрбум төгрөг төлөвлөсөн ба ХБНГУ-аас 2.4 сая еврогийн дэмжлэг үзүүлэн ажиллаж байна. Түүнчлэн манай улсаас төсөвлөсөн нэг тэрбум төгрөгийг хээрийн хайгуул судалгаа, гүйцэтгэлийн хяналт, мониторинг, тайлан боловсруулалтын ажилд зарцуулж байгаа ажээ. Харин ХБНГУ-аас олгох 2.4 сая еврогийн санхүүжилтийг ойн тооллогын ажлын бэлтгэл ажлууд болон тайлан мэдээллийг боловсруулах, лаборатори байгуулж чадавхижуулах, техник тоног төхөөрөмжөөр хангах, ойн тооллогын ажилд ашиглах хиймэл дагуулын мэдээ болон түүнд тайлан, боловсруулалт хийх техник тоног төхөөрөмж, программ хангамж авах, сургалтууд зохион байгуулах, хяналтын давтан тооллого явуулах, ойн мэдээллийн санг үүсгэх зэрэг ажилд зарцуулах аж.

 

Тооллого энэ сарын сүүлчээр дуусч, ирэх оны эхний хагаст дүнгээ гаргана. Цаашид таван жил тутамд ойн тооллого хийгдэх юм байна.