УИХ дахь МАН-ын бүлгийн зүгээс Ерөнхий сайд ийнхүү Засгийн газрын бүтцээ өөрчилж байгаа нь хоёр жилийн өмнөх Шинэчлэлийн Засгийн газрын бүтэц бүрэлдэхүүн буруу байсан гэдгийг өөрөө хүлээн зөвшөөрч байна гэж ойлгож байгаа ажээ. Түүнчлэн бүтцийн асуудлыг хэлэлцэхдээ яамдын тоог илүү цөөлж, цомхон болгох, үүнээсээ хэмнэсэн хөрөнгөөрөө цалин тэтгэврийг нэмэх, саатаж байгаа хөрөнгө оруулалт, бүтээн байгуулалтын ажлыг санхүүжүүлэх ёстой гэдэг байр суурийг Ерөнхий сайдад илэрхийлсэн байна. Тухайлбал, Хүн амын хөгжил, нийгмийн хамгааллын яамыг Хөдөлмөрийн яамтай, Соёл, спорт, аялал жуулчлалын яамыг Боловсрол, шинжлэх ухааны яаманд нэгтгэх боломжтой гэсэн байр суурьтай байгаа аж. Үүний хариуд Ерөнхий сайд Н.Алтанхуяг МАН-ын бүлгийн илэрхийлж буй байр суурийг авч хэлэлцэж болох юм гэжээ.

 

Мөн бүтцийн асуудал ярьж байгаа ч хажуугаар нь хариуцлагын асуудлыг орхигдуулахгүй, тухайлбал Н.Батбаяр сайдтай холбоотой асуудлыг заавал хэлэлцэнэ гэдгийг хэлсэн юм. Үүнээс гадна сайд нарын зөвлөхийн тоог багасгах талаар санал илэрхийлсэн байна. Аймаг, нийслэлийн Засаг дарга нар найм хүртэл орлогчтой байгааг багасгавал төр цомхон болж, зардлыг хэмнэх бололцоо бүрдэнэ гэж үзэж буйгаа УИХ дахь МАН-ын бүлгийн дарга С.Бямбацогт хэллээ.