УИХ дахь АН-ын бүлэг дотооддоо зөвшилцөх хэрэгтэй байна гэсэн шалтгаанаар нэг хоногийн завсарлага аваад байсан юм. Гэвч өдөр АН-ын бүлгийн гишүүд бүтцийн талаарх асуудлаа зөвшилцөж дууссан тул байнгын хороог хуралдуулж болно хэмээн үзэж  14:00 цагийн орчимд байнгын хорооны нийт гишүүдийнхээ 57.8 хувийн ирцтэйгээр хуралдаанаа эхлүүлсэн байна. Тус хуралд Ерөнхий сайд Н.Алтанхуяг өөрийн биеэр оролцсон юм.

 

Хуралдаанаар Ерөнхий сайдын өргөн барьсан бүтцийн асуудалтай холбоотой хэд хэдэн асуудалд гишүүд саналаа хэлж, өөрчлөгдөхөөр заасан бүтэц тус бүрт санал хурааж байгаа юм. Энэ үеэр УИХ-ын гишүүн М.Энхболд “Ерөнхий сайдын өргөн барьсан Засгийн газрын бүтцийн төслийг илүү цомхон болгомоор байна. МАН-ын бүлэг хэлэлцээд ССАЖЯ-ны ажлын үүрэг функцыг яамдуудад өгөөд ажиллуулах бүрэн боломжтой гэж үзсэн. Өмнөх ажлын туршлага байгаа тул бүтцээ эргэн харж энэ саналыг хүлээн авна гэдэгт найдаж байна” хэмээн мэдэгдсэн байна. Ингээд ССАЖЯ-ыг бусад яамдад нэгтгэх санал байнгын хорооны гишүүдийн олонхийн саналыг авч дэмжигджээ. Энэ шийдвэр хэрэв чуулганы нэгдсэн хуралдаанд гишүүдийн олонхийн саналыг авч чадвал ССАЖЯ-г өөр аль нэг яаманд нэгтгэх юм.