Жил бүрийн дөрөвдүгээр сарын 2-ны өдөр дэлхий даяар Олон улсын хүүхдийн номын өдрийг тэмдэглэдэг уламжлалтай. Энэхүү өдрийг хүүхдүүдийг ном уншихад уриалах, хүүхдийн уран зохиолын ач холбогдлыг таниулах, уншлагын соёлыг дэмжих зорилгоор тэмдэглэдэг юм.

Олон улсын хүүхдийн номын өдрийг Данийн алдарт зохиолч, үлгэрийн мастер Ханс Кристиан Андерсений төрсөн өдөртэй хамт тэмдэглэдэг.

Тэрээр дэлхийн хүүхдүүдийн хайртай болсон “Бяцхан лусын дагина”, “Цасан хатан”, “Муухай дэгдээхэй”, “Хатан хааны шинэ хувцас” зэрэг олон алдарт үлгэрийг бичсэн бөгөөд түүний бүтээлүүд өнөөдөр ч хүүхдийн уран зохиолын үнэт өвд тооцогддог.

Энэхүү өдрийг 1967 онд Олон улсын хүүхдийн номын зөвлөл санаачлан анх тэмдэглэж эхэлсэн бөгөөд түүнээс хойш дэлхийн олон улс оронд жил бүр өргөн хүрээнд тэмдэглэдэг болсон байна.

Олон улсын хүүхдийн номын өдрөөр дэлхийн улс орнууд дараах арга хэмжээг зохион байгуулдаг уламжлалтай. Үүнд:

• Хүүхдийн номын үзэсгэлэн гаргах
• Үлгэр унших арга хэмжээ зохион байгуулах
• Зохиолч, орчуулагчидтай уулзалт хийх
• Хүүхдүүдэд ном хандивлах аян өрнүүлэх
• Уншлагын уралдаан, тэмцээн зохион байгуулах
• Сургууль, цэцэрлэгт номын өдөрлөг хийх

Эдгээр арга хэмжээ нь хүүхдүүдийн ном унших сонирхлыг нэмэгдүүлэх, танин мэдэхүйн хүрээг өргөжүүлэхэд чухал ач холбогдолтой гэж үздэг.

Судлаачдын үзэж буйгаар бага наснаасаа ном уншдаг хүүхдүүд:

• Сэтгэн бодох чадвар илүү хөгжсөн
• Хэл ярианы баялаг өндөр
• Төсөөлөн бодох чадвар сайтай
• Бүтээлч сэтгэлгээ илүү хөгжсөн
• Сурлагын амжилт илүү байдаг.

Мөн ном унших нь хүүхдийн сэтгэл зүйн хөгжилд эерэг нөлөө үзүүлж, анхаарал төвлөрөл, ой тогтоолтыг сайжруулдаг гэж судалгаанд дурджээ.

Олон улсын хүүхдийн номын өдөр нь хүүхэд бүрийг номтой нөхөрлөж, унших дадалтай болгох, мэдлэг боловсролыг дэмжих, ирээдүйн уншигчдыг төлөвшүүлэхэд чиглэсэн чухал өдөр юм.

Хүүхэд бүр номтой нөхөрлөж чадвал ирээдүй бүр ч  гэрэлтэй болно...