Улсын Гуравдугаар Төв Эмнэлгийн Зүрх судасны үндэсний төвийн мэргэжлийн баг Орхон, Булган аймагт ажиллаж, орон нутгийн иргэдэд зүрх судасны нарийн мэргэжлийн тусламж үйлчилгээг хүргэн, эмч мэргэжилтнүүдийн чадавхыг бэхжүүлэх сургалт зохион байгуулжээ.

Томилолтын хүрээнд Орхон аймгийн Бүсийн оношилгоо, эмчилгээний төвд титэм судсан дотуурх оношилгоо, эмчилгээ болон судасны мэс заслыг амжилттай хийж, нийт 60 гаруй иргэнд үзлэг, оношилгоо, зөвлөгөө үйлчилгээ үзүүлсэн байна.

Мөн хоёр аймгийн 27 эмнэлгийн 59 анхан шатны эмч нарт зүрх судасны чиглэлээр чадавхжуулах сургалт зохион байгуулж, орчин үеийн оношилгоо, эмчилгээний арга зүйн талаар мэдлэг, туршлага хуваалцжээ.

Энэхүү хамтарсан ажиллагаа нь орон нутгийн иргэдэд нарийн мэргэжлийн тусламж үйлчилгээг ойртуулахын зэрэгцээ бүсийн хэмжээнд зүрх судасны тусламж үйлчилгээний чанар, хүртээмжийг нэмэгдүүлэхэд чухал ач холбогдолтой болж байгааг эмч мэргэжилтнүүд онцоллоо.