Авлигатай тэмцэх газрын Урьдчилан сэргийлэх, соён гэгээрүүлэх хэлтэс нь 2026 оны 6 дугаар сарын 15-19-ний өдрүүдэд авлига, ашиг сонирхлын зөрчил, авлигын гэмт хэргээс урьдчилан сэргийлэх чиглэлээр Нийслэлийн Засаг даргын Тамгын газар, Соёл урлагийн газар, Аж үйлдвэр, эрдэс баялгийн яам, Ашигт малтмал, газрын тосны газарт, “Улсын авто замын санд авлигын эрсдэлийн үнэлгээ хийх” удирдамжийн дагуу Зам тээврийн яаманд тус тус ажиллаж байна.

Түүнчлэн Эрүүл мэндийн яаманд холбогдох “Эрүүл мэндийн магадлалын зөвлөлийн дүрэм”-д авлигын эрсдэл үүсэж болзошгүй эсэхийг хянаж хариу хүргүүлж, төсөв, санхүү, худалдан авах ажиллагаа, гадаадын зээл, тусламжаар хэрэгжиж буй төсөл хөтөлбөрийн мэдээлэлд дүн шинжилгээ хийж, төсвийн хөрөнгийн зарцуулалтад тавих хяналтыг сайжруулах чиглэлээр зөвлөмж гаргалаа.

Төрийн байгууллагын хүнд суртал, чирэгдэл, төрийн албан хаагчийн ёс зүйн асуудлаар иргэн, аж ахуйн нэгж, байгууллагаас ирүүлсэн 15 гомдол, мэдээллийг хянан шалгаж, авлигын эсрэг сургалтад нийт 1879 албан тушаалтныг хамрууллаа.